रोयल इन्फिल्डको सबैभन्दा शक्तिशाली बाइक बुलेट ६५० सार्वजनिक, नोभेम्बरमा लन्च हुने सम्भावना

रोयल इन्फिल्डले हालै सम्पन्न इक्मा अटो शो २०२५ मा बुलेट श्रृंखलाको सबैभन्दा शक्तिशाली मोटरसाइकल बुलेट ६५० सार्वजनिक गरेको छ । नयाँ बुलेटमा ६५० सीसी प्यारालल ट्विन इन्जिन जडान गरिएको छ । सो मोटरसाइकल गोवामा नोभेम्बर २१ देखि २३ सम्म आयोजना हुने मोटोभर्स २०२५ मा औपचारिक रूपमा डेब्यु हुने अपेक्षा गरिएको छ।

नयाँ बुलेट ६५० मा टल स्ट्यान्स, क्लासिक टियरड्रप र १९५० को दशकमा प्रयोग गरिएको प्रसिद्ध ‘टाइगर–आई’ पाइलट ल्याम्पयुक्त हेडल्याम्प क्यास्केट राखिएको छ । यसमा हातले बनाइने पिनस्ट्राइप र ट्रेडिशनल अल मेटल बडी समावेश गरिएको छ । यद्यपि यसमा दशौँ वर्षदेखि पहिचान बनेको विशेष सिल्हुट यथावत राखिएको छ।

नयाँ बुलेटमा ६४७.९५ सीसी प्यारेलल ट्विन इन्जिन समावेश छ, जसले  ७२५० आरपीएममा ४७ बीएचपी र ५६५० आरपीएममा ५२.३ एनएम टर्क प्रदान गर्छ । यसको इन्जिन ६ स्पिड गियरबक्ससँग जोडिएको छ ।

यसको च्यासिस स्टिल ट्युबुलर स्पाइन फ्रेममा आधारित छ । मोटरसाइकलमा १२० एमएम ट्राभलसहित ४३ एमएम टेलिस्कोपिक फ्रन्ट फोर्क र ९० एमएम ट्राभलसहित ट्विन रियर शक एब्जबर्स प्रयोग गरिएको छ । यसको फ्रन्टमा १९ इन्च र रियरमा १८ इन्चको ह्विल प्रयोग गरिएको छ । बाइकको अगाडि ३२० एमएम र पछाडि ३०० एमएम डिस्क ब्रेकसँगै ड्युअल च्यानल एबीएस समावेश गरिएको छ।

सेफ्टीका लागि सो बाइकमा एलईडी हेडल्याम्प, एलईडी टेलल्याम्प र नयाँ एनालग डिजिटल इन्स्ट्रयुमेन्ट क्लस्टर दिइएको छ, जसले इन्धन स्तर, ट्रिप मिटर, गियर पोजिसन र सर्भिस रिमाइन्डर जस्ता सूचना देखाउँछ । टुरिङका लागि युएसबी टाइप सी चार्जिङ पोर्ट पनि उपलब्ध छ। नयाँ बुलेटको तौल २४३ किलोग्राम रहेको छ भने यसमा १४.८ लिटर क्षमताकाे इन्धन ट्याङ्की दिइएको छ । यसको सिटको उचाई ८०० एमएम राखिएको छ ।