ग्रेटवाल मोटर्सको नयाँ इलेक्ट्रिक कार लन्च हुँदै, चीनमा प्री–सेल सुरु

काठमाडौं–ग्रेट वाल मोटर (जिडब्लुएम) ले आफ्नो नयाँ इलेक्ट्रिक कार ओरा५ को प्री–सेल सुरु गरेको छ । सुरुवाती मूल्य १५ हजार ४०० डलर कायम गरी कम्पनीले चिनियाँ बजारमा बुकिङ लिन थालेको हो ।

६ वटा कलर अप्सनमा उपलब्ध हुने ओरा५ ४८० र ५८० किलोमिटर रेन्ज विकल्पका साथ कुल ५ वटा ट्रिममा उपलब्ध हुनेछ । उन्नत ड्राइभिङ एसिस्टेन्स सिस्टमका लागि कारको हाई ट्रिममा अत्याधुनिक लिडार समेत उपलब्ध गराइएको छ ।

रेट्रो शैलीमा डिजाइन गरिएको ओरा५ को लम्बाई ४४७१ मिमी, चौडाई १८३३ मिमी र उचाई १६४१ मिमी तथा ह्विलवेश २७२० मिमी छ । कारमा १५० किलोवाट क्षमताको शक्तिशाली मोटर जडान गरिएको छ भने ब्याट्री प्याक ४५.३ र ५८.३ किलोवाट आवर अप्सनमा उपलब्ध हुनेछ ।

ओरो५ को इन्टेरियरमा १०.२५ इन्चको डिजिटल इन्स्ट्रुमेन्ट क्लस्टर र १५.६ इन्चको २.५ के फ्लोटिङ सेन्ट्रल कन्ट्रोल स्क्रिन रहेको मिनिमिलिस्टिक डिजाइन रहेको छ, जसमा दुई–स्पोक फ्ल्याट बटम स्टेयरिङ ह्वील पाइने छ । गाडीको अपरेटिङ सिस्टम जिडब्लुएमको तेस्रो–पुस्ताको कफी ओएसद्वारा समर्थित छ ।

चिनियाँ बजारमा छिट्टै लन्च हुने तयारीमा रहेको ओरा५ निकट भविष्यमा नेपाली बजारमा समेत उपलब्ध हुने अनुमान गर्न सकिन्छ । ग्रेटवाल मोटर्सका सवारीसाधान भीजी इम्पेक्स प्रालिले बिक्री गर्दै आएको छ । कम्पनीले हाल यसको ओरा ०३ इलेक्ट्रिक कार उपलब्ध गराइरहेको छ ।