जेके टायरद्वारा पहिलोपटक सवारी साधनको लागि इम्बेडेड स्मार्ट टायर लन्च

जेके टायर एण्ड इन्डस्ट्रिज लिमिटेडले भारतीय बजारमा सवारी साधनलाई लक्षित गर्दै देशकै पहिलो इम्बेडेड स्मार्ट टायर लन्च गरेको छ । कम्पनीले सो अत्याधुनिक प्रविधियुक्त टायर आफ्नै अनुसन्धान तथा विकासमा तयार गरेको हो ।

नयाँ स्मार्ट टायरमा टायर भित्रै विशेष सेन्सर जडान गरिएको हुन्छ, जसले टायरको हावाको चाप, तापक्रम तथा हावा लिकेजको स्थिति निरन्तर निगरानी गर्छ । सो टायरले सडक सुरक्षामा महत्वपूर्ण योगदान पुर्‍याउने कम्पनीको दाबी छ । हावा कम भएको वा तापक्रम बढी भएको अवस्थामा उक्त सिस्टमले तुरुन्तै सतर्कता दिने हुँदा दुर्घटनाको जोखिम घट्नुका साथै टायरको आयु वृद्धि र माइलेजमा पनि सुधार हुने कम्पनीको दाबी छ ।

यी टायरहरू सुरुवाती चरणमा १४ देखि १७ इन्च साइजमा उपलब्ध हुनेछ र डिलरशिपमार्फत आफ्टरमार्केटमा बिक्री सुरु हुनेछ । सो प्रविधिले टायर प्रेसर मोनिटरिङ सिस्टमलाई क्लाउड बेस्ड एनालिटिक्ससँग जोड्छ । यो पहिलो पटक सन् २०१९ मा ट्रेल सेन्सरको मदतमा पेश गरिएको थियो । यसले ‘मेक इन इन्डिया’ र ‘आत्मनिर्भर भारत’ लक्ष्यलाई बलियो आधार प्रदान गरेको छ।

कम्पनीका अध्यक्ष तथा प्रबन्ध निर्देशक डा. रघुपति सिंहानियाले स्मार्ट टायरको सफल विकासलाई इनोभेशन यात्रामा महत्वपूर्ण उपलब्धि भनेका छन् । जेके टायरले यसअघि पनि पङ्चर-प्रुफ टायरसहित विभिन्न सवारी साधनका लागि प्रविधिमैत्री टायरहरू बजारमा उपलब्ध गराउँदै आएको छ।