नेपालमै उत्पादन हुने हुन्डाई भेन्युमा अब झन आकर्षक डिजाइन र उन्नत सुबिधा

काठमाडौं– हुन्डाई मोटर्स इन्डियाले अन्ततः नयाँ पुस्ताको २०२५ भेन्यु सार्वजनिक गरेको छ । कैयौं दिनदेखि जारी टिजर र झलकपछि कम्पनीले नयाँ भेन्यु लन्च गरेको हो । कम्पनीले यसको सुरुवाती मूल्य भारतीय बजारमा ७ लाख ९० हजार निर्धारण गरेको छ ।

तीनवटा पारट्रेनमा आएको नयाँ भेन्यु ८ वटा भेरियन्ट र ८ वटा रंग विकल्पमा उपलब्ध हुनेछ । नयाँ भेन्युमा एलईडी हेडलाइट, डीआरएल, नयाँ क्रोम, १७ इन्चको अलोय ह्वील लगायत विशेषता दिइएको छ ।

भेन्युको भित्री भाग नयाँ स्तरमा पुगेको छ, जहाँ नयाँ ड्यासबोर्डको ढाँचामा दुईवटा १२.३ इन्चका कभ्र्ड स्क्रिन राखिएका छन् । नयाँ सेन्टर कन्सोल डिजाइन, थ्री स्पोक स्टेरिङ ह्विल र भेन्टिलेटेड फ्रन्ट सिटजस्त आधुनिक फिचरले भित्री भागलाई थप आरामदायी र आधुनिक बनाएको कम्पनीको दाबी छ ।

प्रविधि मन पराउने प्रयोगकर्ताहरूका लागि लेभल २ एडास, ब्लु लिंक कनेक्टिभिटी, वायरलेस एप्पल कार प्ले तथा एन्ड्रोइड अटोजस्ता सुविधा उपलब्ध छन् । अन्य विशेषतामा ड्राइभर ट्रयाक्सन मोड, ६ वटा एयरब्याग, ३६० डिग्रीको क्यामेरा, ब्लाइन्ड स्पट मनिटर र इलेक्ट्रिक सनरूफ उपलब्ध गराइएको छ ।

हुन्डाईले भरपर्दो इन्जिन विकल्पलाई कायम राखेको राख्दै भेन्युमा नयाँ सिक्स स्पिड टर्क कन्भर्टर अटोमेटिक विकल्प समेत दिएको छ । सो नयाँ एसयुभीले कम्प्याक्ट एसयुभी सेग्मेन्टमा नयाँ मापदण्ड स्थापित गर्दै किया सोनेट, मारुति ब्रेज्जा, टाटा नेक्सन, स्कोडा काइल्याक, रेनो काइगर, निसान म्याग्नाइट, र महिन्द्रा एक्सयूभी (एक्सओ) जस्ता मोडलसंग सिधा प्रतिस्पर्धा गर्ने जनाइएको छ ।

भेन्यु नेपाली बजारमा समेत उपलब्ध रहँर्दै आएको लोकप्रिय मोडल हो । हुन्डाईको आधिकारिक वितरक लक्ष्मी इन्टरकन्टिनेन्टल प्रालिले नेपालस्थित प्लान्टबाट उत्पादन गर्दै आएको भेन्यु कम्प्याक्ट एसयुभी सेग्मेन्टमा निकै सफल मोडल सावित भएको छ । यो नेपालमा उत्पादन हुने हुन्डाईको पहिलो मोडल समेत हो । नयाँ भेन्युलाई अवको केही समयपछि नेपालमै एसेम्वल गर्ने कम्पनीको तयारी छ ।