बिएमडब्लुले ल्यायो ४५० सिसीको नयाँ मोटरसाइकल, ३१० जिएसलाई प्रतिस्थापन गर्ने

काठमाडौं–बिएमडब्लु मोटोरार्डले इटालीको मिलानमा हालै सम्पन्न इक्मा अटो शो २०२५ मा आफ्नो नयाँ एड्भेन्चर बाइक एफ ४५० जिएस सार्बजनिक गरेको छ । सो नयाँ मोटरसाइकलले बजारमा हाल उपलब्ध ३१० जिएसलाई प्रतिस्थापन गर्ने जनाइएको छ ।

सो नयाँ मोटरसाइकल गत वर्ष आयोजना गरिएको इक्मामा प्रदर्शन गरिएको कन्सेप्ट संस्करण जस्तै देखिएको छ । बिएमडब्लुकै स्पोर्टस बाइक आर १३०० जिएसबाट प्रेरित यस मोटरसाइकलमा क्वाड एलईडी डिआरएल सहितको एलईडी हेडल्याम्प रहेको छ ।

एफ ४५० जिएसमा ४५० सिसी क्षमताको ट्विन–सिलिन्डर इन्जिन जडान गरिएको छ, जसले ८,७५० आरपिएममा ४७.५ बिएचपी पावर र ६,७५० आरपिएममा मा ४३ एनएम टर्क जेनेरेट गर्दछ । साथै, यसमा ६ स्पीड गियरबक्स उपलब्ध गराइएको छ ।

ट्युब्लर स्टील फ्रेममा आधारति एफ ४५० जिएसको तौल १७५ किलोग्राम छ र यसमा १४–लिटर इन्धन ट्यांक समावेश गरिएको छ । बाइकमा ४३ मिमी केवाईबी अपसाइड–डाउन फोर्क र पछाडि मोनो–शक सस्पेन्सन सेटअप राखिएको छ । स्पोर्ट र जिएस ट्रफी भेरियन्टमा रिबाउन्ड र कम्प्रेसनको लागि सस्पेन्सन समायोजन गर्न सकिन्छ ।

बाइकमा कनेक्टिभिटी फिचर, हिटेड ग्रिपहरू, एबिएस प्रो, डायनामिक ट्रयाक्सन कन्ट्रोल, इन्जिन ड्रयाग टर्क कन्ट्रोल र डायनामिक ब्रेक कन्ट्रोल सहितको ६.५ इन्चको टिएफटी डिस्प्ले लगयात सुबिधा पाउन सकिन्छ ।

त्यसैगरी, यसको टप स्पेक जिएस ट्रफी भेरियन्टमा बिएमडब्लुको इजी राइड क्लच, शिफ्ट असिस्टेन्ट प्रो, एल्युमिनियम इन्जिन गार्ड र टिन्टेड -याली स्क्रिन समेत पाउन सकिन्छ ।