ट्रायम्फले ल्यायो स्पिड ट्रिपल १२०० आरएक्स, यस्तो छ मूल्य र बिशेषता

ट्रायम्फ मोटरसाइकलले भारतमा आफ्नो नयाँ स्पिड ट्रिपल १२०० आरएक्स लिमिटेड एडिसन बाइक लन्च गरेको छ। यसको मूल्य करिब २३ लाख भारु तय गरिएको छ । कम्पनीले सो बाइक विश्वव्यापी रूपमा केवल १२०० युनिट मात्र उत्पादन गर्ने भएकाले यो बाइक अत्यन्तै सीमित ग्राहकहरूका लागि उपलब्ध हुनेछ।

नयाँ स्पिड ट्रिपल १२०० आरएक्समा १,१६३ सीसी क्षमताको इनलाइन-३ लिक्विड-कुल्ड इन्जिन प्रयोग गरिएको छ, जसले १८३ हर्सपावर र १२८ एनएम टर्क उत्पादन गर्छ । यसको इन्जिन ६ स्पिड गियरबक्ससँग जोडिएको छ। यसमा कार्बन फाइबर र टाइटेनियमबाट बनेको एक्रापोभिकको स्पेशल एक्जस्ट सिस्टम पनि दिइएको छ। बाइकको तौल १९९ किलोग्राम रहेको छ ।

ट्रायम्फ स्पिड ट्रिपल १२०० आरएक्सको लुक यसको मानक मोडल स्पिड ट्रिपल १२०० आरएसबाट प्रेरित छ। तर, यसमा आरएक्स ग्राफिक्स र स्पोर्टी एर्गोनोमिक डिजाइन थपिएको छ। यसको लोअर क्लिप अन ह्यान्डलबार र रियर सेट फुटपेगका कारण यसले अझ रेसिङ अनुभव प्रदान गर्छ।

आरएक्स भेरिएन्टमा सवारी कन्ट्रोलका लागि अत्याधुनिक ओहलिङ्स स्मार्ट ईसी ३.० एक्टिभ सस्पेन्सन सिस्टम र ओहलिङ्स एसडी ईसी स्टेयरिङ ड्याम्पर दिइएको छ। ब्रेकिङका लागि ब्रेम्बो स्टाइलमा क्यालिपर र ब्रेम्बो एमसीएस रेडियल मास्टर सिलिन्डर भएको ट्विन-डिस्क सेटअप प्रयोग गरिएको छ ।

ट्रायम्फले भारतका लागि कति युनिट उपलब्ध गराइने भन्ने जानकारी नखुलाएको भए पनि, यो विश्वव्यापी सीमित संस्करण भएको कारण यसको उपलब्धता अत्यन्त सीमित रहने अनुमान गरिएको छ।