साउन महिनामा भित्रिए १६० युनिट विद्युतीय गाडी, कुन क्षमताका कति ?

काठमाडौं - नेपालमा विद्युतिय सवारीसाधन (ईभी) को माग तीव्र गतिमा बढिरहेको छ। भन्सार विभागको तथ्याङ्कअनुसार चालु आर्थिक वर्ष २०८२/८३ को पहिलो महिना श्रावणमै करिब ४१ करोड ८८ लाख ३९ हजार रुपैयाँ बराबरका ईभी नेपाल भित्रिएका छन्। यस अवधिमा सरकारले करिब २८ करोड २९ लाख ५३ हजार रुपैयाँ राजस्व संकलन गरेको छ। एक महिनाको अवधिमै १६० थान विद्युतीय कार, जीप र भ्यान नेपाल भित्रिएका हुन् ।

विभागका अनुसार श्रावण महिनामा सबैभन्दा धेरै ५१ किलोवाटदेखि १०० किलोवाट क्षमताका गाडी आयात भएका छन् । यो क्षमताको १०७ थान गाडी आयात भएका छन् । जसको आयातमा २६ करोड ८२ लाख ४० हजार रुपैयाँ बाहिरिएको छ । यी गाडी आयात मात्र सरकारले १६ करोड ८४ लाख रुपैयाँ राजस्व संकलन गरेको छ।

त्यस्तै, १०१ किलोवाटदेखि २०० किलोवाट क्षमताका ३१ थान गाडी नेपाल भित्रिएका छन्। ती गाडीहरूको आयात मूल्य ११ करोड ५७ लाख ७८ रुपैयाँ र राजस्व ९ करोड ५० लाख ३७ हजार रुपैयाँ रहेको छ ।

यो अवधिमा ५० किलोवाटसम्मका २१ थान कार, जीप र भ्यान आयात भएको छ। जसको आयातमा २ करोड ९९ लाख ७२ हजार रुपैयाँ बाहिरिएको छ । यसबाट सरकारले १ करोड १८ लाख ४८ हजार रुपैयाँ राजश्व संकलन गरेको छ।

त्यस्तै, २ सय किलोवाटदेखि ३ सय किलोवाटको एक थान गाडी आयात हुँदा ४८ लाख ४९ हजार रुपैयाँ बाहिरिएको छ । जसबाट ७५ लाख ७९ हजार रुपैयाँ बाहिरिएको छ । यस्तै, ४८८ थान इलेक्ट्रिक तीनपाङ्ग्रे सवारीसाधन पनि नेपाल भित्रिएका छन्। जसको आयात मूल्य ५ करोड ९ लाख ८९ हजार रुपैयाँ रहेको छ यसबाट सरकारले १ करोड ७९ लाख रुपैयाँ राजश्व संकलन गरेको छ ।

नेपालमा पेट्रोलियम पदार्थको बढ्दो मूल्य, वातावरणीय चाप र सरकारले दिएको कर प्रोत्साहनले ईभीतर्फ उपभोक्ता आकर्षित भइरहेका छन्। साथै, बैंक तथा वित्तीय संस्थाले पनि ईभी खरिदमा कर्जा सहज बनाइरहेका कारण बजार थप विस्तार भएको हो। नेपाल विद्युत प्राधिकरणले देशभर चार्जिङ स्टेशन विस्तारलाई प्राथमिकतामा राखेकाले आगामी महिना र वर्षहरूमा ईभीको आयात अझै बढ्ने प्रक्षेपण गरिएको छ।