यी हुन् यूएसडी फोर्क भएका सबैभन्दा किफायती मोटरसाइकल

भारतमा अब यूएसडी फोर्क मोटरसाइकल सस्तो मूल्यमा पनि उपलब्ध हुन थालेका छन्। पहिले यो प्रविधि महँगो र प्रिमियम बाइकहरूमा मात्र पाइन्थ्यो, तर अहिले निर्माण लागत घटेपछि बजेट सेगमेन्टका बाइकमा पनि यसको प्रयोग बढ्दो छ। भारतमा १ लाख ५ हजार भारु भन्दा कम मूल्यका बाइकमै यस्तो फिचर दिन थालिएको छ, जसमध्ये धेरैजसो मोडल नेपाली बजारमा पनि उपलब्ध छन् ।

होन्डा सीबी१२५ हर्नेट भारतको सबैभन्दा सस्तो यूएसडी फोर्क भएको बाइक हो। यो आफ्नो सेगमेन्टमा यस्तो सुविधा ल्याउने पहिलो मोडल हो । यसमा ४.३ इन्चको टीएफटी डिस्प्ले र ब्लुटुथ जडान सुविधा रहेको छ, जसले यसलाई सुविधासम्पन्न बनाएको छ।

बजाज पल्सर एन१६० तीन भेरिएन्टमा उपलब्ध भए पनि यूएसडी फोर्क सुविधा यसको शीर्ष भेरिएन्टमा मात्र पाइन्छ। यसमा राइड मोड र टर्न-बाई-टर्न नेभिगेसन सुविधा पनि दिइएको छ।

टीभीएस अपाचे आरटीआर १६० ४भी सात भेरिएन्टमा उपलब्ध छ, तर यूएसडी फोर्क सुविधा उच्च भेरिएन्टमा मात्र पाइन्छ। यसमा ड्युअल च्यानल एबीएस, राइड मोड, समायोज्य लिभर र ब्लुटुथसहितको पूर्ण डिजिटल इन्स्ट्रयुमेन्ट क्लस्टर जस्ता प्रिमियम सुविधाहरू छन्।

हिरो एक्स्ट्रिम १६०आर ४भी मा ३७ एमएम बाक्लो केवाईबी यूएसडी फोर्क प्रयोग गरिएको छ, जसले यसलाई लुक्स र सवारी गुणस्तरमा थप प्रिमियम बनाएको छ।

टीभीएस रोनिनमा सेगमेन्टकै ठूलो ४१ एनएम शोवा यूएसडी फोर्क दिइएको छ। यो आरआर३१० बाट लिइएको भए पनि रोनिनको क्रुजर-स्टाइल सवारीका लागि स्प्रिङ र ड्याम्पिङ सेटिङ परिवर्तन गरिएको छ।