बीवाईडी एट्टो १ किन्ने विचार छ ? कति पर्ला मासिक किस्ता ?

बीवाईडीको आधिकारिक वितरक साइमेक्स इंकले हालै नेपाली बजारमा नयाँ इलेक्ट्रिक कार एट्टो १ उपलब्ध गराएको छ । बीवाईडी सिगल समेत भनिने सो ईभीलाई अन्तर्राष्ट्रिय बजारमा डल्फिन मिनी र डल्फिन सर्फ समेत भनिन्छ ।

नेपाली बजारमा एट्टो १ दुई भेरिएन्टमा उपलब्ध छ । त्यसमध्ये डाइनामिक मोडलको मूल्य २८ लाख ९५ हजार रूपैयाँ छ भने प्रिमियम मोडलको मूल्य ३२ लाख ९९ हजार छ । यस मध्ये डाइनामिक मोडल किन्न चाहने ग्राहकले सुरुमा ११ लाख ५८ हजार रुपैयाँ डाउन पेमेन्ट बापत जम्मा गर्नुपर्ने हुन्छ ।

त्यसपछि मासिक २६ हजार ६५० रुपैयाँ किस्ता तिर्नेगरी सो ईभी खरिद गर्न सकिन्छ । गाडीको मूल्यको ६० प्रतिशतसम्म कर्जा सुविधा पाइने भएको कारण एट्टो १ को इन्ट्री भेरिएन्टको लागि १७ लाख ३७ हजार रुपैयाँ बैंक तथा वित्तीय संस्थाबाट कर्जा सुविधा लिनु पर्छ । विभिन्न बैंक तथा वित्तीय संस्थाले यसका लागि आवश्यक कर्जा उपलब्ध गराउन सक्छन् ।

‘विश्व कार पुरस्कार’ जितेको बीवाईडीको यो मोडल अहिलेसम्म १० लाखभन्दा बढी बिक्री भइसकेको छ । हालै काठमाडौंमा सम्पन्न नाइमा मोबिलिटी एक्सपोमा कार बुकिङ गर्नेहरूलाई नगद छुट, एक वर्षको अटो बिमा, ३.३ किलोवाटको होम चार्जर र १० वर्षको निःशुल्क बीवाईडी एप सुविधा दिइएको थियो ।

एट्टो १ डाइनामिकमा ३० किलोवाट आवरको ब्याट्री हुन्छ। यो ब्याट्री फुल चार्ज गरेपछि २३० किलोमिटर यात्रा गर्न पुग्छ। बीवाईडीको एड्भान्स्ड ई–प्लेटफर्म ३.० मा बनेको र क्रान्तिकारी ब्लेड ब्याट्रीद्वारा सुसज्जित एट्टो १ मा सेल–टु–बडी (सीटीबी) टेक्नोलोजी रहेको छ, जसले एकीकृत बनावट र गाडीको सुरक्षालाई मजबुत बनाएको छ, जुन ईभीका लागि विशेष रुपमा बनेको छ ।

बीवाईडी एट्टो १ नेपालको सहरी इलेक्ट्रिक मोबिलिटीका लागि गेम चेन्जर बनेर आएको कम्पनीको भनाइ छ । वर्ल्ड कार अवार्ड्समा वर्ल्ड अर्वन कार अफ द इयर २०२५ को उपाधि समेत प्राप्त गरेको सो प्रतिष्ठित ईभीले मूल्य, सुरक्षा र नवप्रवर्तनको क्षेत्रमा आफूलाई एक कदम अगाडि बढाएको कम्पनीको भनाइ छ ।