एनआईयूले नेपाल ल्यायो नयाँ इलेक्ट्रिक स्कुटर र मोटरसाइकल, यस्तो छ मूल्य र विशेषता

काठमाडौं– एनआईयूले नाइमा मोबिलिटी एक्सपोमा दुई नयाँ इलेक्ट्रिक बाइक लन्च गरेको छ । एनआईयूको नेपालका लागि आधिकारिक वितरक इन्फिनिटी नेपालले एफक्यूआई ३०० मोडलको स्कुटर र आरक्यूआई मोडलको इलेक्ट्रिक मोटरसाइकल लन्च गरेको हो ।

कम्पनीले नेपाल ल्याएको एफक्यूआई ३०० शक्तिशाली र प्रिमियम डिजाइन भएको आधुनिक स्कुटर हो । यस स्कुटरमा ७२ भोल्ट २८ एम्पियर आवर क्षमताको दुईवटा ब्याट्री प्याक जडान गरिएको छ । सिंगल चार्जमा १५० किलोमिटर रेन्ज दिने दाबी गरिएको एफक्यूआई ३०० लाई ८८ किलोमिटर प्रतिघण्टाको उच्च गतिमा हाँक्न सकिन्छ ।

यस स्कुटरमा एनआईयू स्मार्ट एप मार्फत जीपीएस, क्लाउड कनेक्टिभिटी र डाइग्नोटिक्सल लगायत सुबिधा प्रयोग गर्न सकिन्छ । स्पोर्टी डिजाइनमा तयार पारिएको यस स्कुटरमा बोल्ड देखिने एलईडी म्याट्रिक्स लाइट जडान गरिएको छ । स्कुटरको मूल्य ३ लाख ८५ हजार रुपैयाँ निर्धारण गरिएको छ ।

कम्पनीले ल्याएको अर्को नयाँ मोडल आरक्यूआईमा उच्च पर्फमेन्सयुक्त डुअल ब्याट्री जडान गरिएको छ, जसले एकपटकको फुल चार्जमा १८० किलोमिटर रेन्ज दिने दाबी गरिएको छ । यस मोटरसाइकललाई १६० किलोमिटर प्रतिघण्टाको उच्च गतिमा हाँक्न सकिन्छ ।

नयाँ पुस्ताका राइडरलाई लक्षित गरी प्रिमियम डिजाइनमा तयार पारिएको यस मोटरसाइकलमा स्मार्ट कनेक्टिभिटीका लागि एआई, जिपिएस र एन्टि थेप्ट जस्ता सुबिधा दिइएको छ । यस मोटरसाइकलको मूल्य ९ लाख ९९ हजार रुपैयाँ निर्धारण गरिएको छ ।