नेपाली बजारमा अब जिलीको ईएक्स५ ईभी, नाडा अटो शोमा विशेष अफर हुने

काठमाडौं– नेपाली बजारमा विद्युतीय सवारीसाधन (ईभी) का नयाँ मोडलहरू भित्रिने क्रम जारी छ । नयाँ नयाँ मोडलहरू भित्रिरहँदा ग्राहकहरूका लागि पनि विकल्पहरू थपिँदै गएका छन् भने ब्रान्ड बिचको प्रतिस्पर्धा समेत तीव्र बन्दै गएको छ ।

यसैबिच हालै चीनको पहिलो निजी स्वामित्वको र सबैभन्दा ठूलोमध्येको एक जिली अटो होल्डिङ ग्रुपले उत्पादन गरेको २०२५ जिली ईएक्स५ सिरिज नेपाल भित्रिएको छ ।

जिलीको नेपालका लागि आधिकारिक वितरक एलआरआर मोटर्सले विशेषगरी नाडा अटो शो २०२५ लाई लक्षित गरी जिलीका २ मोडल जिली ईएक्स५ प्रो र जिली ईएक्स५ म्याक्स भित्र्याएसँगै उत्पादनको छोटो समयभित्रै विश्वब्यापीरुपमा चर्चा बटुल्न सफल गाडीहरुमाथि नेपाली उपभोक्ताको पहुँच सुनिश्चित भएको हो । उसो त नेपाली बजारमा प्रवेश गर्नुअघि नै नेपाली अटोमोबाइल पारखीहरुले यी गाडीहरुबारे चासो समेत राख्न थालिसकेका थिए ।

नेपाली ईभी बजारमा डिजाइन, प्रविधि, ब्याट्री क्षमता र मूल्यको दृष्टिले अन्य मोडलको भन्दा यी मोडलहरूको अति नै बढी प्रतिस्पर्धात्मक लाभ रहेको देखिन्छ । यी मोडलहरू स्नो–ह्वाइट, फ्रोस्टी ग्रे, मूनलाइट सिल्भर, कार्बन ब्ल्याक र टक्र्वोइज ग्रिन गरी ५ आकर्षक रङमा उपलब्ध छन् । यी दुवै मोडलमा ६०.२ किलोवाट प्रतिघण्टा क्षमता भएको एलएफपी सर्ट ब्लेड ब्याट्री प्रयोग गरिएको छ, जुन अन्य सामान्य सर्ट ब्लेड ब्याट्रीभन्दा सुरक्षा, ऊर्जा घनत्व, प्रभावकारीता र दिगोपनाको दृष्टिकोणले उच्चस्तरीय मानिन्छ ।

गाडी निर्माता जिली होल्डिङ ग्रुप आफैले उत्पादन गरेको यो ब्याट्रीले एट (आठ वटा) निडल परिक्षण पास गरेसँगै संसारकै पहिलो वाटर, फायर र बुलेट प्रुफ प्रमाणित भएको छ । यस ब्याट्रीको आयु ३५ सय चार्ज रिसाइकल (लगभग १० लाख किमी अथवा ५० वर्ष) रहेको छ जुन हालसम्म उपलब्ध अन्य कुनै पनि ब्याट्रीको क्षमताभन्दा धेरै भएको कम्पनीको भनाइ छ । साथै आधिकारिक आयातकर्ता एलआरआर मोटर्सले जिलीका गाडीहरुको ब्याट्रीमा आठ वर्ष वा २ लाख किमीसम्म वारेन्टी समेत दिएको जनाएको छ ।

यी दुवै मोडलमा जडान गरिएको १६० किलोवाट (२१५ हर्सपावर) क्षमताको मोटरले ० देखि १०० किमी प्रतिघण्टाको गति ६.९ सेकेन्डमै पूरा गर्न सक्ने क्षमता राख्छ । यसमा सीएलटीसी परीक्षण अनुसार ५३० किमी र डब्लुएलटीपी मापन अनुसार ४३० किमीसम्मको माइलेज रहेको कम्पनीले जनाएको छ, जुन नेपालको भौगोलिक बनावटका लागि पर्याप्त मानिएको छ ।

आकर्षक डिजाइन र इन्टेरियर
जिली ईएक्स५ श्रृखलाको बाह्य डिजाइन आधुनिक एरोडायनामिक प्रोफाइलमा आधारित छ, जसमा एलइडी हेडलाइट, टेललाइट र आकर्षक फ्रन्ट ग्रिल समावेश छन् । आन्तरिक भागमा १५.४ इन्चको टचस्क्रिन इन्फोटेनमेन्ट सिस्टम, १०.२ इन्चको डिजिटल क्लस्टर, वायरलेस चार्जिङ, भ्वाइस कमान्ड, प्यानोरामिक सनरुफ तथा फाइभ रो सिट रहेको छ ।

ईएक्स५ मा थप रूपमा हेडअप डिस्प्लेका साथै हिटिङ, भेन्टिलेटेड र मसाजिङ क्षमतायुक्त आरामदायी सिटको साथै फ्लाईमीको साउण्ड सिस्टम समेत उपलब्ध छन्, जसले उपभोक्तालाई लक्जरी अनुभव दिन्छ ।

अत्याधुनिक प्रविधि र आकर्षक मूल्य
यी मोडलहरूमा ६ वटा एयरब्याग, एबीएस, ईबीडी, इएससी, एईबी, ब्लाइन्ड स्पट मोनिटरिङ, हिल असिष्ट लगायतका सुरक्षा प्रविधिहरू समावेश छन् ।

साथै, जिलीले आफ्नै विकसित स्मार्ट ककपिट अपरेटिङ सिस्टम प्रयोग गरेको छ, जसले स्मार्ट ड्यासबोर्ड र ओटिए अपडेटको सुविधा दिन्छ । ईएक्स५ प्रो र ईएक्स५ म्याक्स दुबैमा इन्टिग्रेटेड स्मार्ट युआइ, एपमार्फत गाडीको गति नियन्त्रण गर्ने सुविधा पनि रहेको छ ।

नेपाली बजारका लागि ईएक्स५ प्रो को मूल्य ५८ लाख रुपैयाँ तोकिएको छ भने ईएक्स५ म्याक्सको ६८ लाख रुपैयाँ तोकिएको छ । तथापि, नेपाली उपाभोक्ताको अवस्था र रुचिलाई मध्यनजर गर्दै कम्पनीले नाडा अटो शोको क्रममा मूल्यमा केही विशेष लाभ समेत प्रदान गर्ने जनाएको छ ।