इलेक्ट्रिक गाडीको कारोबारमा लक्ष्मी ग्रुपको अर्को पहल, नाईमा एक्सपोमार्फत फरथिङ ब्रान्ड लन्च गर्दै

काठमाडौं — नेपालको बढ्दो इलेक्ट्रिक सवारी साधन (ईभी) बजारमा सशक्त पहिचान बनाइसकेको लक्ष्मी ई–मोबिलिटीले चीनको उदाउँदो इलेक्ट्रिक गाडी ब्रान्ड फरथिङलाई नेपाली बजारमा ल्याउने घोषणा गरेको छ ।

नेपालको इलेक्ट्रिक मोबिलिटी क्रान्तिलाई अझ तीव्र बनाउने दिशामा यो एक महत्वपूर्ण कदम मानिएको छ । फरथिङको पहिलो मोडल नेपाली बजारमा साउन २१ देखि२५ गतेसम्म काठमाडौंको भृकुटीमण्डपमा आयोजना हुने नाइमा नेपाल मोबिलिटी एक्सपो २०२५ मार्फत सार्वजनिक गरिनेछ ।

लक्ष्मी ग्रुप —सन् १९७३ देखि नेपालमा व्यापारिक गतिविधि गर्दै आएको बहुआयामी र पुरानो व्यापारिक घराना हो । लक्ष्मी ग्रुपले विगतका दशकहरूमा अटोमोबाइल व्यापारमा आफ्नो उपस्थिति विस्तार गर्दै हुन्डाई, बिएमडब्लु, केई र एसएमएल जस्ता विश्वविख्यात ब्रान्डहरू मार्फत यात्रुवाहक र मालवाहक गाडी तथा अटो पार्ट्स वितरण गर्दै आएको छ । अब यसै यात्रामा फरथिङ पनि थपिन लागेको हो ।

सन् २०२४ को मे महिनामा, लक्ष्मी ग्रुपले नेपालकै पहिलो फोर–ह्वीलर गाडी एसेंब्ली प्लान्ट ‘लक्ष्मी मोटर कर्पोरेसन’ सञ्चालनमा ल्याएको छ । हुन्डाई गाडीहरूका लागि बनाइएको यो अत्याधुनिक एसेम्वली प्लान्टले नेपालको अटोमोबाइल औद्योगिकीकरणमा ऐतिहासिक फड्को मारेको छ ।

लक्ष्मी समूह यस्तो सुविधा सञ्चालन गर्ने पहिलो नेपाली समूह बनेको छ । त्यसैगरी, ग्राहकको सहजता र ईभी पूर्वाधार सुदृढ पार्न लक्ष्मी समूहले री–ल्याक्स नामक ६३ भन्दा बढी रिचार्ज नेटवर्क र रिपेयर स्टेसनहरूको सञ्जाल देशभर फैलाएको छ, जसले नेपालमा इलेक्ट्रिक गाडी प्रयोगलाई थप सरल र भरपर्दो बनाएको छ ।

विश्वव्यापी रूपमा स्मार्ट डिजाइन र अत्याधुनिक इलेक्ट्रिक मोबिलिटी प्रविधिका लागि चिनिएको फरथिङ ब्रान्डले नेपालमा प्रिमियम इलेक्ट्रिक एसयूभीसँग आफ्नो सुरुवात गर्दैछ । यो गाडीले प्रदर्शन, प्रविधि र आधुनिक डिजाइनलाई समेट्दै नेपाली ग्राहकको बदलिंदो आवश्यकतामा केन्द्रित समाधान दिन्छ ।

६४.४ किलोवाट आवर ब्याट्री, ९९ किलोवाट क्षमताको मोटर पावरसहितको यो एसयूभी ले ४०० किलोमिटर भन्दा बढीको दूरी तय गर्नसक्ने अनुमान गरिएको छ । यो एसयूभी सहर भित्रको यात्रादेखि लामो दूरीका लागि समेत उपयुक्त विकल्प बन्ने कम्पनीको विश्वास छ । पर्मानेन्ट म्याग्नेट सिन्क्रोनस मोटरले सहज र छरितो ड्राइभिङ अनुभव दिनेछ भने भित्री डिजाइनमा आराम, प्रयोग सहजता र स्मार्ट प्रविधिलाई विशेष ध्यान दिइएको छ ।

‘फरथिङ केवाल गाडी मात्र नभएर यो भविष्यको मोविलिटीप्रतिको दृष्टिकोण समेत हो । नेपाली उपभोक्तालाई विश्वस्तरिय इलेक्ट्रिक प्रबिधीमा पहुँच दिने लक्ष्यसहित फरथिङ ब्रान्ड ल्याएको छौ’ लक्ष्मी ई–मोबिलिटीका प्रवक्ताले भने ।