अगाडि बढिरहेको कारमा अचानक रिभर्स गियर लाग्दा के हुन्छ ?

कारको हरेक गियरको गति हुन्छ। यसको अर्थ एउटा गियरमा कारलाई निश्चित गतिमा चलाइन्छ र त्यसपछि गियर परिवर्तन गरेर गति बढाइन्छ वा घटाइन्छ । कारमा विभिन्न गियरहरू बिस्तारै गति बढाएर परिवर्तन गरिन्छ ताकि कारले बिस्तारै गति प्राप्त गर्न सकोस्। 

कारको गति नियन्त्रण गर्न गियरको प्रयोग गरिन्छ र पछाडि जानका लागि रिभर्स गियरको प्रयोग गरिन्छ । तर, कार अगाडि बढिरहेको बेला अचानक रिभर्स गियरमा गयो भने के हुन्छ?

म्यानुअल ट्रान्समिसन कारमा यदि उच्च गतिमा कार चलिरहेको छ भने रिभर्स गियर राख्न सामान्यतया सकिँदैन। यद्यपि प्रयास गर्दा गियरका पाङ्ग्राहरू भाँचिने जोखिम हुन्छ। यस्तो अवस्थामा ठूलो आवाज आउँछ र गियर बक्स बिग्रिएर कार चलाउन नसकिने अवस्था आउँछ। कम गतिमा भए पनि रिभर्स गियर लगाउन खोज्दा कारले झट्का खाई अचानक रोकिन सक्छ। यसले यात्रुहरूलाई चोट पुर्‍याउनसक्छ र पछाडिबाट आउने अन्य सवारीसाधनसँग ठोक्किने खतरा बढाउँछ। साथै, गियर बक्स मर्मतमा ठूलो खर्च लाग्न सक्छ।

अटोमेटिक ट्रान्समिसन कारमा भने यस्तो सम्भावना कम हुन्छ किनभने यी कारका गियरहरू लक हुन्छ र अगाडि बढिरहेको अवस्थामा रिभर्स गियर लगाउन सकिँदैन। यदी गियर लकमा समस्या आयो र रिभर्स गियर लगाउन प्रयास गरियो भने नतिजा म्यानुअल कारजस्तै हुनसक्छ।