बीवाईडी सिगलले पार ग-यो १० लाख युनिटको ग्लोबल सेल, ल्यायो नयाँ फ्रि एडिसन

विश्वकै अग्रणी इलेक्ट्रिक सवारी निर्माता कम्पनी बीवाईडीले आफ्नो लोकप्रिय मोडल सिगलको १० लाख युनिट बिक्री भएको बताएको छ । छोटो अवधिमा ‘एक मिलियन’ टार्गेट पुरा हुन यो मोडलको लागि सफलता मान्न सकिने र कम्पनीका लागि ठूलो उपलब्धि रहेको कम्पनीको भनाइ छ ।

नेपाली बजारमा समेत प्रतीक्षा गरिएको बीवाईडीको ह्याचब्याक कार सिगल संसारभर लोकप्रिय बनेको छ । यो गाडी सार्वजनिक भएको २७ महिनाको अवधिमा १० लाख युनिट बिक्री हुनुले यसको लोकप्रियतालाई पुष्टि गरेको छ ।

छोटो आकार, स्मार्ट प्रविधि र वातावरणमैत्री डिजाइनका कारण सिगल विश्वभर लोकप्रिय छ । यो मोडलले युरोपदेखि ल्याटिन अमेरिका हुँदै एशिया र अफ्रिकासम्मका बजारमा बलियो उपस्थिति बनाएको छ ।

यो महत्वपूर्ण उपलब्धि हासिल भएको अवसरमा बीवाईडीले नयाँ भेरिएन्टको रुपमा सिगल फ्रि एडिसन सार्वजनिक गरेको छ । करिव १० हजार ८ सय डलर पर्ने बीवाईडी सिगल फ्रि एडिसनमा अपग्रेड गरिएको ब्राइट क्याबिन, थप सेफ्टी फिचर र सीएलटीसीबाट प्रमाणित ४०५ किलोमिटर रेन्ज दिने क्षमता छ ।

सन् २०२३ को अप्रिलमा पहिलो पटक बीवाईडी सिगल लन्च गरिएको थियो । बीवाईडीको नयाँ फ्रि एडिसन ई–प्लेटफर्म ३.० मा बनेको छ र यसमा ५५ किलोवाटको मोटर प्रयोग गरिएको छ । पहिले देखि नै उपलब्ध बीवाईडी सिगल भने नेपाली बजारमा पनि केही समयमै उपलब्ध हुने अनुमान गरिएको छ ।

बीवाइडीको ई–प्लेटफर्म ३.० मा बनेको सिगलमा इलेक्ट्रिक एड्जस्टेवल ड्राइभर सिट दिइएको छ । चीनमा ३ वटा भेरिएन्टमा उपलब्ध नयाँ सिगलमा ३०.०८ र ३८.८८ किलोवाट आवरको ब्याट्री प्याक जाडन गरिएको छ । जसलाई एकपटक फुल चार्ज गर्दा ३०५ र ४०५ किलोमिटरसम्म रेन्ज पाइने दावी गरिएको छ । कारमा ५५ किलोवाट क्षमताको मोटर जडान गरिइएको छ भने यसले डिसी फास्ट चार्जर समेत सपोर्ट गर्दछ ।

सो नयाँ कारको इन्टेरियरमा १०.१ इन्चको रोटेवल इन्फोटेन्मेन्ट सिस्टम र ७ इन्चको इन्स्ट्रयुमेन्ट क्लष्टर राखिएको छ । साथै यसमा ओटीए अपडेट, चारवटा स्पीकर, भ्वाइस इन्ट्रिगेसन, इन–कार वाईफाई, फोरजी नेटवर्क र किलेस इन्ट्री जस्ता फिचर उपलब्ध गराइएको छ ।

बीवाईडीले यसअघि नेपाल ल्याएको एट्टो ३ र डल्फिनजस्तै सिगल पनि सफल हुने अपेक्षा गर्न सकिन्छ । कम्प्याक्ट एसयुभीमा एट्टो३ र प्रिमियम ह्याचब्याकमा डल्फिन जस्तै इन्ट्रि लेभल ह्याचब्याकमा पनि सिगल मार्केट लिडर बन्ने अनुमान गर्न सकिन्छ ।