बुधबार देखि नेपालमा बिक्री शुरु हुँदै एमजी विन्डसर ईभी, चासोमा मूल्य र फिचर

काठमाडौं – नेपाली बजारमा एमजी विन्डसर ईभीको बिक्री प्रारम्भ हुने भएको छ । नेपालका लागि एमजीको आधिकारिक वितरक पारामाउन्ट मोटर्सले एमजी विन्डसर ईभीको बिक्री औपचारिक रुपमा गर्ने उद्देश्यका साथ आवश्यक तयारी अन्तिम अवस्थामा पु¥याएको बताएको छ ।

नेपालमा उपलब्ध हुने एमजी विन्डसर भारतमा बनेको हो । यो भन्दा पहिले एमजी कोमेट पनि भारतमै उत्पादन भएको थियो ।

एमजी विन्डसर ईभीको मूल्यको वारेमा पनि धेरैलाई चासो छ । यद्यपि भन्सार प्रयोजनको लागि कम्पनीले केही समय पहिले प्रकाशन गरेको मूल्य सुचीअनुसार विन्डसर एक्सक्लुसिभको मूल्य ३९ लाख ४९ हजार र इसेन्स भेरिएन्टको ४२ लाख ४९ हजार रुपैयाँ निर्धारण गरिएको छ । लन्चिङको समयमा यो मूल्यमा केही परिमार्जन पनि हुन सक्छ ।

एमजी विन्डसरमा ३८ किलोवाट आवरको लिथियम आइरन फस्फेट ब्याट्री भएको स्टेबल म्याग्नेटिक सिंक्रोनस मोटर जडान गरिएको छ । सो मोटरले अधिकतम १३६ पीएस पावर र २०० एनएमको अधिकतम टर्क जेनेरेट गर्छ । फुल चार्जमा यसले ३३२ किलोमिटर रेन्ज दिने दाबी गरिएको छ । सो कारमा इको, इको प्लस, नर्मल र स्पोर्ट गरी चार ड्राइभिङ मोड रहेको छ ।

एमजी विन्डसरमा एलईडी लाइट, फ्लस डोर ह्यान्डल, १८ इन्चको अलोय ह्विल, एरो–लाउन्ज सिट, फ्रन्ट भेन्टिलेटेड सिट, वायरलेस एन्ड्रोइड अटो र एप्पल कारप्ले सहितको १५.६ इन्चको टचस्क्रिन इन्फोटेनमेन्ट सिस्टम, पीएम २.५ फिल्टर, पावर्ड टेलगेट र प्यानोरामिक सनरुफ जस्ता फिचर रहेको छ । कारमा कनेक्टिभिटीको लागि डिजिटल ब्लुटुथ पनि रहेको छ ।

एमजी विन्डसर ईभीमा भएको १५.६ इनचको टचस्क्रिन, ६०४ लिटरको बुट स्पेस, १३५ डिग्रीको एयरो लाउन्ज सिट, वायरलेस चार्जिङ र १८६ एमएमको ग्राउन्ड क्लियरेन्स लगायतका फिचरले धेरैलाई लोभ्याउने अनुमान गर्न सकिन्छ ।

भारतमा राम्रो चर्चा कमाइरहेको कारण एमजी विन्डसर ईभी नेपाली बजारमा समेत धेरैले रुचाउने अनुमान गरिएको छ ।