ग्राहकको विश्वास जितेर सडकमा आफ्नो उपस्थिती मजवुत वनाउँदै ब्रम्बी ईभी

काठमाडौं – नेपाली बजारमा पछिल्लो समय नयाँनयाँ ब्रान्डका ईभी भित्रिरहेका छन् । यसरी आएका ईभीमध्ये केही ब्रान्डले मात्रै ग्राहकको विश्वास जित्न सफल भएका छन् । ग्राहकको विश्वास जित्दै सडकमा आफ्नो उपस्थिती थप मजवुत वनाइरहेको ब्रान्डका रुपमा बीएडब्लु ब्रम्बीलाई समेत लिन सकिन्छ ।

गत वर्ष आयोजना भएको नाडा अटो शोमार्फत नेपाली बजारमा औपचारिक प्रवेश गरेको ब्रम्बी मुलतः इन्ट्रि लेभल ईभी पारखी लक्षित कम्प्याक्ट ह्याचब्याक कार हो । सम्भवतः यो सेग्मेन्टमै सबैभन्दा कम मूल्यमा विक्रि हुँदै आएको यसको मूल्य २२ लाख ९० हजार रुपैयाँ पर्छ ।

बीएडब्लुको नेपालका लागि आधिकारिक वितरक एलआरआर मोटर्सले हाल उक्त मूल्यमा ३ लाख रुपैयाँ छुट दिएर जम्मा १९ लाख ९९ हजारमा यसलाई बिक्री गर्दै आएको छ । यो मूल्य सिमित अवधिका लागिमात्र लागु हुने भन्दै कम्पनिले जतिसक्दो छिटो ब्रम्बी ईभी खरिद गर्न ग्राहकमाझ आह्वान गरिरहेको छ ।

सडकमा वढ्दो उपस्थिती
गत वर्षको नाडा अटो शोमा तीन दर्जन बढि बुकिङ पाएको ब्रम्बी ईभी हात पार्न ग्राहकले लामै समय कुर्नु प¥यो । समयमै गाडि ल्याउन नसक्दा केही ग्राहक गुमाउनु परेको कम्पनीका महाप्रबन्धक अनिल पोखरेलले वताए । ‘नाडा अटो शोमा बुकिङ लिएका ग्राहकलाई समयमै गाडी दिन नसक्दा हामीले केही ग्राहक मिस गर्यौ । तर पछिल्लो २÷३ महिनायता आयत नियमित भैरहेको छ । नेपाल आएका ५० भन्दा बढि कारमध्ये अधिकांश युनिट बिक्री भैसकेको छ भने माग बढ्दो क्रममै छ’ उनले भने ।

नेपालमा यो कार विशेषगरी, वैंक तथा वित्तिय संस्थामा काम गर्ने कर्मचारी, डाक्टर, इन्जिनियर र विश्वविद्यालयका प्रोफेसर एबं लेक्चरर हरुमाझ लोकप्रिय बनिरहेको छ । यसैगरी, घरमा पहिले नै एउटा ठूलो गाडी भएकाहरुले सेकेन्ड कारका रुपमा प्रयोग गर्न समेत यसलाई रुचाएका छन् । ‘इन्ट्रि लेभल कारमार्फत आफ्नो ड्राइभिङ यात्रा सुरु गर्न चाहने ग्राहकले ब्रम्बी ईभी रुचाउने गरेको पोखरेलले बताए ।

यस्तो छ रेन्ज र फिचर
बीएडब्लु ब्रम्बी सिटी कार हो । ३० किलोवाटको मोटर र १७.२८ किलोवाट आवरको ब्याट्री भएको यो सिटी कारले सिंगल चार्जमा २०० किलोमिटर रेन्ज दिने दाबी गरिएको छ ।

होम एसी चार्जरको सहयोगले चार्ज गर्न सकिने सो कारमा एलएफपी ब्याट्री रहेको छ । यसको लम्बाई, चौडाई र उचाई क्रमशः ३५३२ एमएम, १४९८ एमएम र १६०५ एमएम रहेको छ । यसमा १५५–६५आर१३ साइजको टायर जडान गरिएको छ ।

सिम्पल बडी डिजाइन र पर्सनलाइज्ड फ्रन्ट फेस सेप सहितको फेसनेबल एपियरेन्स रहेको बीएडब्लु ब्रम्बी ईभीलाई इको र स्पोर्ट ड्राइभिङ मोडमा चलाउन सकिन्छ । सुरक्षा अन्तर्गत यसले फ्रन्ट कोलिजन र पोस्ट क्र्यास सेफ्टी सम्बन्धी विभिन्न टेस्टबाट सुरक्षा प्रमाणपत्र पाएको छ ।

यसमा इन्टेलिजेन्ट टायर प्रेसर डिटेक्सन, फ्रन्ट र रियर पार्किङ राडार, ३६० प्यानोरामिक भ्यु र अन्य हाई–टेक सेफ्टी फङसन उपलब्ध छन् । क्याबिनमा अन्य फिचरका अतिरिक्त १०.५ इन्चको इन्फोटेनेमेन्ट स्क्रिन रहेको छ ।