‘नो फायर, नो एक्सप्लोजन’ मापदण्ड पुरा गर्ने पहिलो ब्याट्री उत्पादक बन्यो सीएटीएल

विश्वको सबैभन्दा ठूलो ब्याट्री निर्माता सीएटीएल ‘नो फायर, नो एक्सप्लोजन’ मापदण्ड पूरा गर्ने पहिलो ब्याट्री उत्पादक बनेको छ । ब्याट्री सुरक्षाको लागि अनिवार्य गरिएको नयाँ संस्करण जीबी ३८०३१–२०२५ लाई चीन सरकारले मार्च २८, २०२५ मा जारी गरेपछि सीएटीएलले सबैभन्दा पहिले यस्तो मापदण्ड पुरा गरेको हो ।

नयाँ मापदण्ड पुरा गर्न ब्याट्री निर्माताहरूले नयाँ परीक्षणहरू पास गर्नु अवाश्यक थियो । सोही क्रममा सीएटीएल ब्याट्रीको थर्मल डिफ्युजन परीक्षण गर्दा थर्मल रनवेमा आगो लाग्न वा विस्फोट हुनबाट जोगिएको थियो । परीक्षणका क्रममा ब्याट्रीबाट उत्पन्न हुने धुवाँले सवारी साधनमा बस्नेहरूलाई क्षति पुर्याएन भने आगो वा विस्फोट हुनु अघि चेतावनी संकेतहरू प्राप्त भएको थियो ।

सीएटीएलका अनुसार, पहिलो पटक जुन २०२२ मा सेल–टु–प्याक प्रविधिको तेस्रो पुस्ताको रूपमा बजारमा आएको क्विलिन ब्याट्री निरीक्षणको लागि पेश गरिएको थियो । परीक्षण रिपोर्ट चाइना अटोमोटिभ टेक्नोलोजी एण्ड रिसर्च सेन्टरद्वारा जारी गरिएको हो । यो उत्पादन परीक्षण र प्रमाणीकरण प्रदान गर्ने कम्पनीहरूको एक प्रसिद्ध समूह हो ।

विश्वभर १ करोड ८० लाख भन्दा बढी सवारी साधनमा सीएटीएलद्धारा निर्मित ब्याट्री प्रयोग गरिएको छ । यस कम्पनीले उत्पादन गर्ने ब्याट्रीलाई जिकर, एइटो, एलआई एइटो, साओमी, नेटा, अवतार र लोटस लगायत थुप्रै प्रख्यात ईभी निर्माताले प्रयोग गर्दै आएका छन् ।