आईपीएल २०२५ मा शतक प्रहार गरेका वैभव सूर्यवंशीलाई मर्सिडिज बेन्ज उपहार

आईपीएल २०२५ मा सोमवार जयपुरमा भएको राजस्थान रोयल्स र गुजरात टाइटन्सबीचको खेलमा १४ वर्षीय वैभव सूर्यवंशीले पहिलो पटक शतक प्रहार गर्दै सबैको ध्यान तानेका छन्। खेलमा शानदार प्रदर्शन गरेपछि उनी रातारात चर्चाको शिखरमा पुगेका छन्। उनलाई क्रिकेट जगतको नयाँ चम्किलो तारा भन्दै प्रशंसा गरिँदैछ।

यस ऐतिहासिक खेलपछि राजस्थान रोयल्सका मालिक रञ्जित बरठाकुरले वैभवको उत्कृष्ट प्रदर्शनबाट प्रभावित भई उनलाई एक नयाँ मर्सिडिज बेन्ज कार उपहार स्वरूप दिएका छन्। यद्यपि, कुन मोडलको कार दिइएको हो भन्ने खुलाइएको छैन। वैभव अझै १४ वर्षका भएकाले कानुनी रूपमा गाडी चलाउन मिल्दैन तापनि यो उपहार भविष्यमा उनको सफलताको प्रतीक बनेको छ।

बिहारको समस्तीपुर जिल्लास्थित ताजपुरमा जन्मिएका वैभव सूर्यवंशीको जीवन यात्रा प्रेरणादायी रहेको छ। बाल्यकालदेखि नै क्रिकेटप्रति गहिरो लगाव राख्ने वैभवलाई उनका आमाबाबुले सधैं साथ दिएका थिए। ६-७ वर्षको उमेरदेखि नै क्रिकेटको शाेख बाेकेका उनलाई दिल्लीसम्म पुर्‍याएर आईपीएल खेल देखाउने काम अभिभावकले गरेका थिए। सामाजिक सञ्जालमा वैभवका बाल्यकालका तस्बिरहरू पनि भाइरल भएका छन्, जसमा उनी दिल्लीको रंगशालामा आफ्ना आमाबाबुसँग देखिन्छन्।

आज त्यो बालक, जसले कहिल्यै क्रिकेटप्रतिको मोह घट्न दिएन, उसले आफ्नो पहिलो आईपीएल शतक मार्फत आफ्नो प्रतिभा प्रमाणित गरिसकेका छन्। वैभवको यो उपलब्धिले न केवल उनलाई लोकप्रिय बनाएको छ, सारा देशले नयाँ प्रतिभाको स्वागत गरिरहेको छ। भविष्यमा उनी भारतीय क्रिकेटको आधारशिला बन्ने सम्भावना प्रबल देखिन्छ।