बक्सी डिजाइन र पप-अप हेडलाइट लगायतका कारण चर्चामा एमजीकाे इलेक्ट्रिक एसयूभी ‘साइबर एक्स’

चीनको साङघाई अटो शोमा एमजीले सार्वजनिक गरेकाे नयाँ इलेक्ट्रिक एसयूभी ‘साइबर एक्स’ अहिले चर्चामा छ ।

यसको बक्सी बडी डिजाइन, म्याट ब्ल्याक एक्सटेरियर र प्रयोगमा हुँदा बाहिर निस्कने र नचल्दा गाडी भित्रै हुने पप-अप हेडलाइटले यसलाई अन्य एसयूभी भन्दा फरक देखाएको छ ।

यो कम्पनीको ‘साइबर’ श्रृंखलाको दोस्रो मोडल हो, जसको पहिलो मोडेल ‘साइबरस्टर’ नोभेम्बर २०२३ मा लन्च भएको थियो ।

गाडीमा स्मोक्ड ब्ल्याक ए र बी पिलरहरू छन्, जसले साइडबाट हेर्दा गाडीको छानो तैरिएको जस्तो देखिन्छ । यसमा सिल्भर र ब्ल्याक टु-टोन फाइभ-स्पोक ह्विल छन् । गाडीको इन्टेरियर र कनेक्टिभिटी फिचरहरू स्मार्टफोन निर्माता ओप्पोको सहकार्यमा तयार पारिएको हो ।

यो एसयूभी एसएआइसीको नयाँ मोडुलर इलेक्ट्रिक प्लेट फर्म ई३ आर्किटेक्चरमा बनेको हो । यो लाइफ स्टाइल एसयूभी सेल टु बडी डिजाइनमा बनेकोले गाडीको तौल कम भई इफिसियन्सी बढाउँछ ।

यसको फ्रन्ट र रियरमा दिएको कनेक्टेड एलईडी लाइट बारले यो एसयूभीलाई मोर्डन लुक्स दिएको छ ।

साइबर एक्सको अन्य प्राविधिक विवरण वा मूल्य सार्वजनिक गरिएको छैन, तर सन् २०२५ मा यसको लन्च हुने बताइएको छ ।

साइबर एक्स नेपाली बजारमा पनि आउने छ । नेपालका लागि एमजीको आधिकारिक बिक्रेता पारामोन्ट मोटर्सले साइबर एक्स सन् २०२५ भित्रै नेपाल ल्याउने सम्भावना छ ।