टाटा मोटर्सले फेरि पछि पा-यो महिन्द्रा र हुन्डाईलाई, उक्लियो नम्बर २ मा

टाटा मोटर्स फेरि भारतको दोस्रो ठूलो कार कम्पनी बनेको छ । गत मार्च महिनामा टाटा मोटर्सले महिन्द्रा एन्ड महिन्द्रा र हुन्डाई मोटरजस्ता कम्पनीहरूलाई पछि पारेको छ। पहिलो स्थानमा भने मारुती सुजुकी छ।

भारतीय अटोमोबाइल बजार प्रत्येक महिनामा नयाँ दिशा तर्फ अग्रसर हुँदै गएको देखिन्छ, जहाँ ग्राहकहरूको रोजाइ र कम्पनीहरूको रणनीतिहरू लगातार परिवर्तन हुँदै गएका छन्। एसयूभी सेग्मेन्टको लोकप्रियता अझै उच्चतम बिन्दुमा छ र ग्राहकहरू अहिले बढी प्रिमियम, सुरक्षित र प्रविधिमा उन्नत विकल्पहरू तर्फ आकर्षित भइरहेका छन्।

मार्च २०२५ मा पनि यो प्रवृत्ति स्पष्ट देखियो । हालै धेरै प्रमुख कार निर्माता कम्पनीहरूले आफ्नो मासिक बिक्री रिपोर्ट सार्वजनिक गरेका छन् । यी तथ्यांकहरूले कम्पनीहरूको वर्तमान उपलब्धि मात्र देखाउँदैन, तर उपभोक्ताहरू कुन ब्रान्ड र मोडलमाथि बढी विश्वास गरिरहेका छन् भन्ने पनि संकेत गर्छ।

मारुती सुजुकी फेरि भारतीय बजारको सर्बाधिक रुचाइएको कम्पनी नै बनेको छ भने टाटा, महिन्द्रा र टोयोटाजस्ता ब्रान्डहरूले उल्लेखनीय वृद्धि गर्दै सबैलाई अचम्ममा पारे। अर्कोतर्फ हुन्डाई जस्तो कम्पनीले केही गिरावटको सामना गर्नु परेको छ।

मार्च महिनामा शीर्ष ५ कार ब्रान्डको रुपमा मारुती सुजुकी, टाटा, महिन्द्रा, हुन्डाई र टोयोटा रहेका छन् । मारुती सुजुकीले मार्च महिनामा १ लाख ३२ हजार ४२३ युनिट बिक्री गरेको थियो भने टाटा मोटर्सले ४८ हजार ४६२ युनिट बिक्री ग-यो । पन्च र नेक्सन जस्ता मोडलका कारण टाटाले ४.२ प्रतिशत वृद्धि हासिल गरेको थियो ।

त्यसैगरी महिन्द्रा एन्ड महिन्द्राले ४६ हजार २९७ युनिट, हुन्डाईले ४२ हजार ५११ युनिट र टोयोटाले २३ हजार ३२८ युनिट बिक्री गरे ।