टेस्ला र बीवाईडीमा कुन ब्याट्री उत्कृष्ट ?

इलेक्ट्रिक सवारी साधनमा प्रयोग हुने प्रविधि तीव्र गतिमा अगाडि बढिरहेको छ । ईभी बजारमा अहिले टेस्ला र बीवाईडी विश्वभर चर्चाको केन्द्र बनेका छन् । यी कम्पनीबिच विश्वकै सबैभन्दा ठुलो इलेक्ट्रिक कार कम्पनी बन्ने प्रतिस्पर्धा चलिरहेको छ।

बीवाईडीले टेस्लालाई चुनौती दिइरहेको छ । बीवाईडीले सस्तो, अधिक एफिसियन्ट र राम्रो डिजाइन भएका ब्लेड ब्याट्री निर्माण गरिरहेको छ, जसले टेस्लाका लागि समस्या खडा गर्न सक्छ । बिश्वभर हाल बीवाईडी ब्लेड ब्याट्री र टेस्ला ब्याट्रीको तुलना गरिएको छ।

रिपोर्टका अनुसार टेस्ला अझै पनि पारम्परिक मोडलकै आधारमा ब्याट्री डिजाइन गरिरहेको छ, जसमा महँगा सामग्रीको प्रयोग भइरहेको छ । जबकि बीवाईडीले पूर्ण रूपमा इलेक्ट्रिक सवारी साधनको अवधारणालाई बदल्ने प्रयास गरेको छ । यसले अनावश्यक एलिमेन्टलाई हटाएर उत्पादन लागत घटाएको छ र परफर्मेन्समा कुनै सम्झौता गरेको छैन।

बीवाईडीको ब्लेड ब्याट्रीले लिथियम आयरन फस्फेट प्रविधि प्रयोग गर्र्दै आएको छ। रिपोर्टका अनुसार टेस्ला ब्याट्रीले बीवाईडीको तुलनामा दोब्बर हिट उत्पन्न गर्छ, जसलाई चिसो बनाइ राख्न महँगो एड्भान्स कुलिङ सिस्टमको आवश्यक पर्छ । यसले टेस्लाको ब्याट्री उत्पादन लागत झन् बढाइदिन्छ।

बीवाईडीले राम्रो डिजाइन, कम लागत र उन्नत प्रविधिको प्रयोग गरेर टेस्लालाई कडा टक्कर दिइरहेको छ, जसले भविष्यमा इलेक्ट्रिक कार बजारमा ठुलो परिवर्तन ल्याउन सक्छ।