बुलेटप्रुफ एआई ब्याट्रीसहित एक्सपेङ जी६ मा ८१ फिचर अपडेट

काठमाडौं– चिनियाँ ईभी निर्माता एक्सपेङले आफ्नो लोकप्रिय बिद्युतिय एसयूभी जी६ को अपडेटेड भर्सन लन्च गरेको छ । कम्पनीले बिहिबार चिनमा जी६ को २०२५ भर्सन लन्च गरेको हो । यस नयाँ भर्सनमा एक्सपेङले ८१ वटा फिचर अपडेट गरेको छ ।

२०२५ एक्सपेङ जी६ मा आर्टिफिसियल इन्टेलिजेन्स(एआई) ब्याट्री प्रयोग गरिएको छ भने कम्पनी आँफैले विकास गरेको ट्युरिङ एआई इन्टेलिजेन्ट ड्राइभिङ सिस्टम दिइएको छ । ५सी अल्ट्रा फास्ट चार्जर सपोर्ट गर्ने यस ईभीलाई १२ मिनेटमै १० देखी ८० प्रतिशतसम्म चार्ज गर्न सकिन्छ । जसबाट ४५० किलोमिटर रेन्ज पाइने दाबी गरिएको छ । साथै, सो ईभीलाई माइनस ३० डिग्री सेन्टिग्रेड चिसोमा समेत १५ मिनेट २० सेकेन्डमा १० देखी ८० प्रतिशतसम्म चार्ज गर्न सकिन्छ ।

सो ईभीमा प्रयोग गरिएको ब्याट्रीलाई सुरक्षित राख्न बुलेटप्रुफ आर्मरको प्रयोग गरिएको छ । जसका कारण, १ हजार सेन्टिग्रेडसम्मको उच्च तापक्रमबाट समेत यसलाई जोगाउन सकिन्छ भने ८० टन वजनसंग ठोक्किँदा समेत ब्याट्री सुरक्षित हुन्छ । रियर ह्विल ड्राइभ भएको यस ईभीमा २१८ किलोवाट क्षमताको मोटर जडान गरिएको छ । जसको पावर, २९२ एचपी र टर्क ४५० एनएम छ ।

६.३ सेकेन्डको एक्सिलेरेसन टाइममा शून्यदेखी १०० किलोमिटरसम्मको गति पकड्न सक्ने नयाँ जी६ को टपस्पिड भने २०२ किलोमिटर प्रतिघन्टा छ । यस कारलाई जम्मा १२.५ किलोवाट आवर ब्याट्री खपतबाट १०० किलोमिटर यात्रा गर्न सकिन्छ ।

२०२५ एक्सपेङ जी६ को अगाडी र पछाडी ८ मेगा पिक्सेल क्यामेरा, मिलिमिटर वेभ राडर, अल्ट्रासोनिक राडर, १५.६ इन्चको सेन्ट्रल कन्ट्रोल स्क्रिन, १०.२५ इन्चको एलसिडी इन्स्ट्रयुमेन्ट प्यानल र क्वालकम स्न्यापड्रयागन चीप लगायत विशेषता दिइएको छ । कुल तीन ट्रिममा उपलब्ध यस ईभीको सुरुवाती मूल्य २४ हजार ४०० डलर निर्धारण गरिएको छ ।

एक्सपेङ जी६ नेपाली बजारमा समेत उपलब्ध रहँदै आएको ईभी हो । नेपालका लागि आधिकारिक विक्रेताका रुपमा सिजी मोटर्सले यसको बिक्रीवितरण गर्दै आएको छ ।