मोदी संगको भेटपछि मस्कले सुरु गरे भारतमा टेस्लाको काम

अमेरिकी ईभी निर्माता टेस्लाले आफ्ना सीईओ एलोन मस्कले वाशिंगटन डीसीमा प्रधानमन्त्री नरेन्द्र मोदीसँग भेट गरेको केही दिनपछि भारतमा पुनः काम सुरु गरेको छ ।

टेस्लाले व्यापार सञ्चालन, ग्राहक सेवा, डेलिभरी तथा अर्डर अपरेसन, शोरूम कर्मचारी र प्राविधिकहरू सहित १३ जागिरहरू पोस्ट गरेको छ । रोजगारहरू मुम्बई र दिल्लीका लागि सूचीबद्ध गरिएका हुन् ।

टेस्लाले टाटा मोटर्स जस्ता अटो उत्पादकहरुमा कार्यरत शीर्ष अधिकारीहरूसँग सम्पर्क गरिरहेको जनाइएको छ । कम्पनीले सम्भावित साझेदारी वा स्थानीय रूपमा कम्पोनेन्ट सोर्सिङका लागि वार्तामा संलग्न हुन सक्ने बताएको छ ।

मिडिया रिपोर्टका अनुसार टेस्लाले भारतमा विद्युतीय सवारी उत्पादन प्लान्ट स्थापना गर्न जग्गाको पार्सल खोजी सुरु गरेको छ । कम्पनीले आफ्नो पहिलो उत्पादन यूनिटको लागि महाराष्ट्रलाई हेरिरहेको भनिएको छ, किनकि यसको पहिले नै पुणेमा कार्यालय छ ।

राज्य सरकारले चाकन र चिखली नजिकै साइटहरू पनि प्रस्ताव गरेको छ । जुन मर्सिडीज–बेन्ज, टाटा मोटर्स, महिन्द्रा, फक्सवागन र बजाज अटो जस्ता ब्रान्डहरूको प्रमुख उत्पादन केन्द्र हो ।

टेस्लाले केही वर्षदेखि भारतीय ईभी बजारलाई हेरिरहेको छ । ईभीमा आयात कर घटाउन सरकारलाई लबिङ गर्न कम्पनीको उत्कृष्ट प्रयासको बाबजुद भारतले स्थानीय उत्पादनमा जोड दिँदै आएको थियो ।