मलेसियाको नम्बर वान बीईभी अब इन्डोनेसियामा बन्यो टप १० बेस्ट सेलिङ कार, नेपाल भित्रिदै

नेपाली बजारमा औपचारिक रुपमा भित्रिने तयारीमा रहेको बीवाईडी एम६ मलेसियामा नम्बर वान बीईभी अर्थात ब्याट्री इलेक्ट्रिक भेइकल बनेको छ । गत नोभेम्बर महिनामा मलेसियामा २३५ युनिट बिक्री भएको बीवाईडी एम६ ले टेस्ला मोडल ३ लाई उछिनेर सो रेकर्ड हासिल गरेको हो । टेस्ला मोडल ३ १९७ युनिट बिक्री भएको थियो । जेपीजे भेइकल रजिस्ट्रेसन डाटा अनुसार सो तथ्य वाहिर आएको हो ।

मलेसियामा बीवाईडी एम६ को स्ट्यान्डर्ड भेरिएन्टको मूल्य १ लाख १० हजार ५ सय आरएम र एक्सटेन्डेड भेरिएन्टको मूल्य १ लाख २४ हजार ५ सय आरएम रहेको छ ।

स्ट्यान्डर्ड भेरिएन्टमा ५५.४ किलोवाट आवरको ब्याट्री रहेको छ, जसले एनईडीसी टेस्ट साइकल अनुसार ४२० किलोमिटर रेन्ज दिने दावी गरिएको छ । त्यसैगरी एक्सटेन्डेड भेरिएन्टमा ७१.८ किलोवाट आवरको ब्याट्री रहेको छ, जसले एनईडीसी टेस्ट साइकल अनुसार ५३० किलोमिटर रेन्ज दिने दावी गरिएको छ ।

त्यसैगरी दक्षिण पूर्वी एसियाको सबैभन्दा ठूलो कार बजार मानिने इन्डोनेसियामा यो वर्षको जुलाईमा बीवाईडी एम६ लन्च गरिएको थियो । सुरुवाती समय देखि नै इन्डोनेसियाली बजारबाट राम्रो प्रतिक्रिया पाएको यो एमपीभी गत अक्टोबर देखि नोभेम्बर सम्म दुई महिना लगातार इन्डोनेसियामा बिक्री हुने टप १० बेस्ट सेलिङ कारमा पर्न सफल भएको छ ।

अक्टोबरमा सो गाडी १ हजार ८६६ युनिट बिक्री भएर आठौ नम्बरमा पर्न सफल भएको थियो । नोभेम्बरमा एक स्थान तल झरेर नवौं स्थानमा रहन सफल भयो । नोभेम्बरमा १ हजार ७७० युनिट बीवाईडी एम६ बिक्री भएको थियो ।

इन्डोनेसियाको अटोमोटिभ इन्डष्ट्री एसोसिएसन, गाइकिन्डोले प्रकाशित गरेको तथ्यांक अनुसार इन्डोनेसियामा दुवै महिनामा बिक्री भएका कार मध्ये पहिलो नम्बरमा टोयोटा एभेन्जा र दोस्रो नम्बरमा होन्डा ब्रिओ रहेका छन् ।

बीवाईडी एम६ नेपाली बजारमा पनि भित्रिने तयारीमा रहेको छ । नेपालका लागि बीवाईडीको आधिकारिक वितरक साइमेक्स इंकले यसको बुकिङ खुला गरेको छ ।