भारत मोबिलिटी एक्सपोमा हुन्डाईको फ्ल्यागशिप ईभी ‘आयोनिक–९’ अवलोकन गर्न पाइने

हुन्डाईको फ्ल्यागशिप इलेक्ट्रिक एसयूभी आयोनिक–९ भारतमा जनवरी २०२५ मा हुने भारत मोबिलिटी एक्सपोमा शोकेस हुने भएको छ । आयोनिक–९ लाई हुन्डाइले यसै वर्ष अमेरिकामा आयोजना भएको एलए अटो शोमा ग्लोबल डेब्यु गरेको थियो ।

हुन्डाईको ई–जिएमपी मोड्युलर प्लेटफर्ममा निर्माण गरिएको आयोनिक–९ को लम्बाई ५,०६० मिमी, चौडाइ १,९८० मिमी र उचाइ १,७९० मिमी छ । यसमा ३,१३० एमएमको ह्वीलबेस छ ।

सो नयाँ एसयुभीमा एलईडी हेडल्याम्प र ब्रान्डको प्यारामेट्रिक पिक्सेल इन्सर्टसहितको टेललाइटहरू, अगाडिको भागमा एलईडी लाइट बार, रिट्र्याक्टेबल डोर ह्यान्डल र २१ इन्चको ह्विल सहति गोलाकार फ्रन्ट फेसिया दिइएको छ ।

६ र ७ सिटर कन्फिगरेसनमा प्रस्ताव गरिएको ईभीको अगाडी सिटमा मसाज फंक्सन र दोस्रो रोमा घुमाउन मिल्ने सिट राखिएको छ । साथै, यसमा प्यानोरामिक सनरुफ, डिजिटल इन्स्ट्रुमेन्ट क्लस्टर र इन्फोटेनमेन्टका लागि १२ इन्चको डुलअ स्क्रिन, स्क्रिन, मल्टि–जोन क्लाइमेट कन्ट्रोल, रूफ–माउन्टेड एयर भेन्ट्स र १४–स्पीकर बोस साउन्ड सिस्टम उपलब्ध छ ।

आयोनिक–९ को लङ रेन्ज ट्रिममा हुन्डाईले ११०.३ किलोवाट आवरको ब्याट्री प्याक जडान गरेको छ । यो रियर ह्विल ड्राइभ र अल ह्विल ड्राइभ दुबै विकल्पमा उपलब्ध छ । सिंगल चार्जमा ६२० किलोमिटर रेन्ज दावी गरिएको आयोनिक–९ लाई स्टार्ट गरेको ५.२ सेकेन्डमै शून्यदेखी १०० किलोमिटर सम्मको गतिमा हाँक्न सकिन्छ ।