८ लाख भारुमा लन्च भयो नयाँ अमेज, यस्तो छ विशेषता

होन्डाले आफ्नो कम्प्याक्ट सेडान अमेजको नयाँ संस्करण ‘अल न्यू अमेज’ लन्च गरेको छ । शुरुवाती मुल्य ८ लाख भारु निर्धारण गरेर लन्च गरिएको नयाँ अमेज पेट्रोल इन्जिनमा मात्र उपलब्ध हुने जनाइएको छ । एमटी र सिभीटी ट्रान्समिन विकल्प दिइएको नयाँ अमेजको टप स्पेककलाई १० लाख ९० हजार भारु पर्ने जनाइएको छ । नयाँ अमेज भी, भीएक्स र जेडएक्स गरी कुल तिन भेरिएन्टमा लन्च भएको हो ।

नयाँ अमेजमा होन्डा सिटी र एलिभेटको जस्तै बोल्ड डिजाइन दिइएको छ । यसको फ्रन्ट ठुलो ग्रिलको दुबै छेउमा डीआरएल सहित स्लिकर एलईडी हेडल्याम्पले सुसज्जित छ । ग्रिलको माथि कनेक्टेड क्रोम स्ट्रिप र अपग्रेड गरिएको क्ल्यामशेल बोनेटलाई प्रिमियम टच दिइएको छ। साथै यसको पछाडि एलईडी टेलल्याम्प र नयाँ डिजाइन गरिएको बम्पर प्रदान गरिएको छ । यसमा शार्क फिन एन्टेना, रिभर्स क्यामेरा र नयाँ अलोय ह्विल पनि देखिएको छ । नयाँ अमेजको डिजाइन पुरानो भन्दा निकै फरक छ ।

कारमा नयाँ ड्यासबोर्ड, वायरलेस एन्ड्रोइड अटो र एप्पल कारप्ले सहितको ठुलो ८ इन्च फ्लोटिङ टचस्क्रिन इन्फोटेनमेन्ट सिस्टम र सेमी–डिजिटल इन्स्ट्रयुमेन्ट क्लस्टर दिइएको छ । यसको क्याबिनमा ड्युअल टोन कलर स्किम र नयाँ अपहोल्स्ट्री जस्ता प्रिमियम टच दिइएको छ । यसमा अटोमेटिक एयर कन्डिसन, रियर एसी भेन्ट र वायरलेस फोन चार्जर जस्ता फिचर उपलब्ध छ । यसको टप भेरिएन्टमा सिंगल–पेन सनरुफ प्रदान गरिएको छ ।

सेफ्टीका लागि यसमा ६ एयरब्याग, एडभान्स ड्राइभर असिस्टेन्स सिस्टम, लेन–किपिङ असिस्ट, एडाप्टिभ क्रुज कन्ट्रोल र अटोनोमस इमरजेन्सी ब्रेकिङ जस्ता फिचर उपलब्ध गराइएको छ । साथै यसमा ईबीडी सहितको एबीएस, हिल–होल्ड असिस्ट र रिभर्स क्यामेरासहितको पार्किङ सेन्सर जस्ता सेफ्टी फिचर उपलब्ध गराइएको छ ।

नयाँ होन्डा अमेजमा पुरानो १.२ लिटर पेट्रोल इन्जिनलाई कायम राखिएको छ । सो इन्जिनले ९० एचपी पावर र ११० एनएम टर्क जेनेरेट गर्छ । सो इन्जिन ५ स्पिड म्यानुअल गियरबक्समा ट्युनिङ गरिएको छ ।