सिद्धबाबा सुरुङमार्गको दुईवटा बाइपास सुरुङको ‘ब्रेक थ्रु’, कहिले सकिएला काम ?

काठमाडौं । निर्माणाधीन सिद्धबाबा सुरुङमार्ग आयोजनाको दुईवटा बाइपास सुरुङको ‘ब्रेक थ्रु’ भएको छ । आयोजना कार्यालयले बाइपास सुरुङ ३ र बाइपास सुरुङ १ को ‘ब्रेक थ्रु’ भएको जानकारी दिएको हो । बाइपास सुरुङ ३ को भदौ २६ गते र बाइपास सुरुङ १ को आज अर्थात् आश्विन ४ गते ‘ब्रेक थ्रु’ भएको छ ।

निर्माण कम्पनी चाइना स्टेट कन्स्ट्रक्सन इन्जिनियरिङ कर्पोरेसन र सडक विभाग अन्तर्गतको गुणस्तर अनुसन्धान तथा विकास केन्द्रबीच वि.सं. २०७८ फागुनमा ठेक्का सम्झौता भई उक्त सुरुङमार्ग काम अगाडि बढेको थियो । यद्यपि यस आयोजनाको कामले वि.सं. २०८० बाट गति लिन थालेको हो ।

उक्त कम्पनीले यस आयोजनामा ११ सय २६ मिटरको तीन वटा बाइपास सुरुङको निर्माण गर्नुपर्ने हुन्छ । जसमध्ये अहिले १ सय ५१ मिटरको बाइपास १ र १३० मिटर बाइसार ३ सुरुङको छिचोलेको हो । हाल १६१ मिटर रहेको बाइपास २ को सुरुङ खन्ने काम भइरहेको आयोजना कार्यालयले जानकारी दिएको छ ।

कार्यालयकाअनुसार उक्त बाइपासको पनि ११७ मिटर खनि सकिएको छ । आयोजनाको लक्ष्य अनुसार काम नभएको देखिएता पनि हाल भने सुरुङमार्गको कामले तीव्रता पाइरहेको इन्जिनियर सबिता ज्ञवालीले जानकारी दिइन् ।

सिद्धार्थ राजमार्गको बुटवल–पाल्पा सडक खण्डमा निर्माणाधीन उक्त सुरुङमार्ग निर्माण शुरु भएको साढे दुई वर्षसम्मको भौतिक प्रगति २२.८५ प्रतिशत छ । सुरुङमार्ग निर्माणका लागि ठेकेदार कम्पनी चाइना स्टेटसँग भ्याटसहित ७ अर्ब ३४ करोड २१ लाख ४७ हजार ३४ ठेक्का सम्झौता भएको थियो ।

आयोजना कार्यालयले सार्वजनिक गरेको तथ्याङ्कले आर्थिक प्रगति भने २६.४ प्रतिशत भएको बताइएको छ । ‘सुरुङमार्गको कामले केही वर्ष अघिसम्म तीव्रता पाउन सकेको थिएन, आयोजनाको काम अगाडि बढाउँदै गर्दा विभिन्न समस्या आए, जसका कारण पनि काम ढिला भयो । अहिले अवरोधलाई सुल्झाउँदै आयोजनाको काम धमाधम भइरहेको छ,’ उनले भनिन् ।

ठेक्का सम्झौता भएको पाँच वर्ष अर्थात् सन् २०२७ मा उक्त सुरुङमार्गको काम सक्नुपर्छ । सुरुङमार्गको काम समयमै सक्ने लक्ष्यका साथ काम भइरहेको आयोजना कार्यालयले जानकारी दिएको छ ।

अहिले सुरुङमार्गको स्लोप कटिङ एण्ड प्रोटेक्सन, नर्थ पोर्टल, साउथ पोर्टल, मेन टनेल र बाइपास टनेल पहिलो, दोस्रो र तेस्रो गरी ७ वटा क्षेत्रमा वर्गीकरण गरेर काम भइरहेको छ । यस्तै, यस आयोजनाको उत्तरी र दक्षिण प्रवेशद्वारमा दुई प्राविधिक भवनका संरचनाहरू बन्नेछन् ।

एमआर १ माउन्टेन साइडमा ९ हजार ६२० वर्गमिटर र एमआर २ मा ७ हजार ४४० वर्गमिटरको टनेल निर्माण गर्नुपर्ने हुन्छ । उक्त साइडको क्रमशः ४८१ र १४१४ वर्गमिटर सुरुङको काम सकिएको बताइएको छ । नदी साइड एमआर १ र एमआर २ को काम भने सुरु गरिएको छैन । उक्त साइडमा क्रमशः १३ सय ६० र ५०० वर्ग मिटरको सुरुङ तयार गर्नुपर्ने हुन्छ ।

मुख्यमार्ग उत्तर तर्फबाट ११ सय वर्गमिटर र दक्षिण तर्फबाट २३ सय वर्गमिटर गरी जम्मा ३४ मिटर खनिएको छ । जसमध्ये हाल क्रमशः ४ सय ९५ र १४ सय ९५ वर्ग मिटर छानेको काम खनिएको कार्यालयले जानकारी दिएको छ । सुरूङमार्ग निर्माणपछि बुटवलबाट पाल्पा, गुल्मी, स्याङ्जा, बाग्लुङ, पर्वत लगायत लुम्बिनी र गण्डकी प्रदेशका पहाडी जिल्लाहरूमा आवतजावत सहज र सुरक्षित हुने अपेक्षा गरिएको छ ।