काठमाडौंमा गरियो १०० बढी पन्च ईभीको डेलिभरी, पूर्वबाट रिजनल लन्च पनि सुरु

काठमाडौं – टाटा मोटर्सको नेपालका लागि आधिकारिक वितरक सिप्रदी ट्रेडिङ्ग प्रालिले यस वर्षको नाडा अटो शो २०२४ मा सार्वजनिक गरेको टाटा पन्च ईभीको १०० भन्दा बढी युनिट डेलिभरी गरेको छ । एक हप्तामै सो संख्यामा गाडी डेलिभरी गरिएको कम्पनीको भनाइ छ ।

पन्च ईभीको नाडाको पहिलो दिनमै १०० भन्दा बढी बुकिङ लिएर बिक्री सुरु भएको थियो । पन्च ईभीको बुकिङ उत्साहजनक रहेको र अब कम्पनीको जिम्मेवारी बुकिङ गरेका ग्राहकलाई जति सक्दो छिटो गाडी डेलिभरी गर्ने रहेको सिप्रदीका प्यासेन्जर भेइकल बिजनेस युनिटका प्रमुख सावन्त जंग सिजापतिले बताए ।

यसका साथै पन्च ईभीको रिजनल लन्च विर्तामोडबाट सुरु भइसकेको समेत कम्पनीको भनाइ छ । टाटा पन्च ईभीको शुरुवाती मूल्य ३३ लाख ९९ हजार रुपैयाँका साथ सार्वजनिक गरिएको हो ।

पन्च ईभी ३३.९९ लाखको सो भेरिएन्टमा यो भन्दा दुई सेगमेन्ट माथिको विशेषताहरु – भ्वाइस एसिस्टेड सनरुफको साथै ३६० डिग्री क्यामेरा, लेदररेटेड भेन्टिलेटेड सिट, ६ वटा एयरब्याग, वायरलेस चार्जर र वायरलेस एन्ड्रोइड अटो÷ एप्पल कार प्लेको आनन्द लिन सकिन्छ ।

पन्च ईभीको ग्राउन्ड क्लियरेन्स १९० एमएम रहेको छ भने यो गाडी जीएनक्यापमा ५ स्टार सेफ्टी रेटिङ पाएको गाडी हो ।