यस्तो छ नेपाली बजारमा उपलब्ध टाटा ईभीको मूल्य

टाटा मोटर्सले इलेक्ट्रिक कार सेगमेन्टमा आफ्नो अग्रणी स्थान कायम राखेको छ । हालसालै कम्पनीले कर्भ ईभीलाई आफ्नो ईभी पोर्टफोलियोमा थपेको छ । यद्यपि नेपाली बजारमा भने यो गाडी आउन अझै समय लाग्न सक्छ ।

नेपाली बजारमा सिप्रदी ट्रेडिङले टाटाका इलेक्ट्रिक कार बिक्री–वितरण गरिरहेको छ । नेपाली बजारमा उपलब्ध टाटाका ईभी र मूल्य यस प्रकार रहेको छ ।

टाटा नेक्सन ईभी

नेपाली बजारमा हाल टाटाको नेक्सन ईभी म्याक्स उपलब्ध छ । एक्सजेड प्लस भेरिएन्टमा रहेको सो ईभीको मूल्य ४५ लाख ९९ हजार रुपैयाँ छ । यसमा ४०.५ किलोवाट आवरको ब्याट्री र १०० किलोवाटको इलेक्ट्रिक मोटर छ । एआरएआईका अनुसार यसले सिंगल चार्जमा ४५३ किलोमिटरको रेन्ज दिन्छ ।

टाटा पन्च ईभी

हालको सबैभन्दा लोकप्रिय इलेक्ट्रिक एसयूभी टाटा पन्च ईभीमा ३५ किलोवाट आवरको ब्याट्री र ९० किलोवाटको मोटर छ । टाटा पन्च ईभीको आधिकारिक मूल्य कम्पनीले नाडा अटो शोबाट सार्वजनिक गर्ने जनाएको छ ।

टाटा टियागो ईभी

टाटा मोटर्सको सबैभन्दा सस्तो इलेक्ट्रिक कार टियागो ईभीको २७ लाख ४९ हजार देखि सुरु भएर २९ लाख ९९ हजारसम्म जान्छ । सो इलेक्ट्रिक ह्याचब्याकमा २४ किलोवाट पावरको ब्याट्री उपलब्ध छ । यसले सिंगल चार्जमा २५० किलोमिटर देखि ३१५ किलोमिटरसम्म रेन्ज दिन्छ । त्यसैगरी ४९ किलोवाटको मोटर छ ।

टाटा टिगोर ईभी

टाटा मोटर्सको इलेक्ट्रिक सेडान टिगोर ईभीको मूल्य ३५ लाख ९९ हजार छ । टाटा टिगोर ईभीले सिंगल चार्जमा ३०६ किलोमिटर रेन्ज प्रदान गर्छ । टिगोर ईभीमा २६ किलोवाट आवरको ब्याट्री र ४८.६४ किलोवाटको मोटर छ ।

टाटा एक्सप्रेस–टी ईभी
नेपालमा ट्याक्सीको रुपमा प्रयोग गर्नका लागि टाटाले एक्सप्रेस–टी ईभी उपलब्ध गराइरहेको छ । एक्सप्रेस–टी ईभीमा २४ किलोवाट आवरको ब्याट्री र ४८.६४ किलोवाटको मोटर रहेको छ । यसको मूल्य ३६ लाख ९९ हजार रुपैयाँ रहेको छ । एआरएआईका अनुसार यसले सिंगल चार्जमा ३०६ किलोमिटरको रेन्ज दिन्छ ।