यामाहा एमटी–१५ भी२ को बुकिङ खुल्ला, यस्तो छ मूल्य र विशेषता

काठमाडौं– यामाहा मोटरसाइकलको नेपालका लागि आधिकारिक वितरक एमएडब्लु इन्टरप्राइजेजले एमटी–१५ भर्सन–२ को बुकिङ खुल्ला गरेको छ । कम्पनीले यसको मूल्य ५ लाख ५० हजार रुपैँया निर्धारण गरेर बुकिङ खुलाएको हो । सो नयाँ मोटरसाइकल आगामी नाडा अटो शोमा औपचारिक लन्च हुने र लगत्तै ग्राहकलाई हस्तान्तरण हुने अनुमान गरिएको छ ।

एमटी–१५ यामाहाको चर्चित न्याकेड स्पोर्ट्स मोटरसाइकल हो । यसअघि रेगुलर एमटी–१५ बिक्री गर्दै आएकोमा हाल यसको अपग्रेडेड भर्सनका रुपमा भी२ मोडल नेपाल आउन लगोको हो । एमटी–१५ भी२ मा रेगुलर भर्सनमा जस्तै १५५ सिसी क्षमताको इन्जिन जडान गरिएको छ । उक्त इन्जिनले १८.५ पिएस पावर र १४.१ एनएम टर्क जेनेरेट गर्दछ ।

सो नयाँ मोटरसाइकलको हेड लाइटलाई अपडेट गरिएको छ भने गोल्डन फ्रन्ट फोर्क र नयाँ सस्पेन्स सिस्टमसहित केही नयाँ फिचर थप गरिएको छ । साथै यसमा डुअल च्यानल एबिएस, ट्रयाक्सन कन्ट्रोल सिस्टम र एसिस्ट एन्ड स्लिपर क्लच लगायत फिचर राखिएको छ ।

एमटी–१५ भी२ लाई १३० किलोमिटर प्रतिघण्टा सम्मको उच्च स्पिडमा हाँक्न सकिने दाबी गरिएको छ । बाइकमा १० लिटर क्षमताको फ्यूल ट्यांक, ८१० एमएम सिट हाइट र १७० एमएम ग्राउन्ड क्लिरियन्स लगायत सुबिधा दिइएको छ ।