कामा ब्रान्डका ईभीको बिक्री शुरु, कमर्सियल र प्यासेन्जर प्रयोजनका लागि उपयुक्त

काठमाडौं – त्रिवेणी मोटोकर्प प्रालिले कामा ब्रान्डको ११ र १४ सिट क्षमताका भ्यान तथा माइक्रो बसको बिक्री वितरण सुरु गरेको छ ।

कमर्सियल र प्यासेन्जर दुबै प्रयोजनमा प्रयोग हुने इलेक्ट्रिक भ्यानको माग नेपालमा बढ्न थालेपछि त्रिवेणी ग्रुप अन्तर्गत त्रिवेणी मोटोकर्पले चीनको स्याङडोङ कामा अटोमोबाइल कम्पनीबाट आधिकारिक वितरक नियुक्त भएपश्चात् कम्पनीले इलेक्ट्रिक भेइकल आयात गरी बिक्री वितरण शुरु गरेको हो ।

कामा ब्रान्डका उत्पादनहरु विश्वका ६० देशहरूमा बिक्री वितरण हुँदै आएको छ । हाल त्रिवेणी मोटोकर्पले सो कम्पनीका ११ सिट र १४ सिटको कामा इलेक्ट्रिक प्यासेन्जर र १.५ टन क्षमता भएको पिकअप भ्यानको बिक्री वितरण सुरु गरेको छ । ११ र १४ सिट क्षमताका कामा ईभी. माइक्रोमा क्रमशः ३५ र ७० किलोवाट क्षमताको मोटर रहेको छ । ४२ किलोवाट आवरको लिथियम आयोन ब्याट्रीले एक पटकको फुलचार्जमा २८० किमी रेन्ज प्रदान गर्ने कम्पनीको भनाइ छ ।

कामाका सबै इलेक्ट्रिक भ्यानहरूमा सीएटीएल ब्याट्री जडित रहेका छन् । कम्पनीले उक्त रेन्जहरू ४० किमी प्रति घण्टाको गतिमा गाडी चलाएमा प्राप्त गर्न सकिने जनाएको छ । त्रिवेणी मोटोकर्पले बिक्री पछिको सेवालाई मध्यनजर गर्दै देशको विभिन्न स्थानमा सुविधा सम्पन्न सर्भिस सेन्टरको स्थापना गरिसकेको छ । पार्ट्सको व्यवस्था पनि गरिसकेको जनाएको छ ।

कम्पनीले सर्भिस सम्बन्धी व्यवस्थाहरूको निरीक्षण तथा भ्रमण गर्न ग्राहकहरूसँग अनुरोधसमेत गरेको छ ।