गिलीको फेरिजोन अटोले ल्यायो १० वर्ष सर्भिस लाइफ भएको ब्याट्री

गिलीको फेरिजोन अटोले नयाँ कमर्सियल ब्याट्री सार्वजनिक गरेको छ । ब्ल्याक टर्टोइज ब्याट्री नाम दिइएको सो ब्याट्रीको सर्भिस लाइफ १० वर्ष वा ८ लाख किलोमिटर सम्म हुनेछ । यसमा १५० एमएम सम्मका पातला सेल प्रयोग गरिएको छ ।

फेरिजोन अटोको भी७ई कमर्सियल भ्यानमा पहिलो पटक सो ब्याट्री प्रयोग गरिएको छ । फेरिजोनका अन्य मोडलमा समेत क्रमशः यो ब्याट्री प्रयोग गरिने छ । फेरिजोन भी७ईले ३०५ किलोमिटरको सीएलटीसी रेन्ज दिनेछ । यसको टेस्टेड रेन्ज भने २८५ किलोमिटर छ ।

गिलीले चीनमा न्यु इनर्जी कमर्सियल भेइकलको विकास र बिक्रीका लागि सन् २०१६ मा फेरिजोन अटोको स्थापना गरेको थियो । हाल कमर्सियल भेइकल, अर्वान बस, लाइट ट्रक र मिथानोलबाट संचालित हुने हेभी ट्रक कम्पनीले उपलब्ध गराइरहेको छ ।

फेरिजोन भी७ई यही अप्रिलमा लन्च भएको थियो । अब ब्ल्याक टर्टोइज ब्याट्री भएको भी७ई उपलब्ध हुनेछ । रेगुलर ब्याट्री भएको भी७ईको मूल्य १ लाख १२ हजार ८ सय युआन थियो भने नयाँ ब्याट्री प्रयोग भए पछि यसको मूल्य १ लाख ४९ हजार ८ सय युआन हुनेछ ।

सो ब्याट्रीमा लिक्विड–कुलिङ फास्ट चार्जिङ सिस्टम प्रयोग गरिएको छ, जसले प्रति सेल ६ हजार चार्ज साइकल लिनेछ । यसलाई १० मिनेट चार्ज गर्दा २०० किलोमिटर दुरी पार गर्न सकिने छ । यसको रसायनिक पक्ष अझै सार्वजनिक भएको छैन । यद्यपि यसमा एलएफपी प्याक हुने सम्भावना छ ।