बजाज पछि अब टीभीएस पनि सीएनजीमा, टीभीएस जुपिटर स्कुटर सीएनजीमा आउने

भारतमा बजाज फ्रिडम १२५ ले अहिले चर्चा पाएको छ । विश्वकै पहिलो सीएनजी बाइकको रुपमाा सो मोटरसाइकलले चर्चा पाएको हो । यद्यपि यसको बिक्री भने अझै प्रारम्भ भएको छैन ।

यही चर्चा बिच टीभीएसले पनि सीएनजी भर्सनमा काम गर्न थालेको समाचार सार्वजनिक भएको छ । टीभीएसले हालको जुपिटर स्कुटरलाई सीएनजीमा ल्याउने तयारी थालेको छ । यसो भयो भने टीभीएस जुपिटर फ्याक्ट्री–फिटेड सीएनजी किटका साथ उपलब्ध हुने विश्वकै पहिलो स्कुटर हुनेछ । टीभीएसले पहिले देखि नै वैकल्पिक इन्धन प्रविधिमा कार्य गर्दै आएको बताएको छ ।

यसका लागि टीभीएसले यु७४० कोडनेम अन्तर्गत कार्य गरिरहेको छ । यस अनुसार यो वर्षको अन्त्य वा २०२५ को शुरुमै यो स्कुटर बजारमा उपलब्ध हुनेछ । कम्पनीले प्रतिमहिना एक हजार युनिट सीएनजी स्कुटर बिक्री गर्ने योजना बनाएको छ ।

बजाजको जस्तै टीभीएसले पनि सीएनजी र पेट्रोल गरी दुई वैकल्पिक ट्यांक उपलब्ध गराउने अनुमान गरिएको छ । यद्यपि यसलाई कसरी एडजस्ट गर्छ भन्ने वारेमा भने केही सार्वजनिक भएको छैन ।