इलेक्ट्रिक अफरोड एसयूभी जेको जे६ नाडा अटो शोमा सार्वजनिक हुने

काठमाडौं– चेरी अन्तर्गतको प्रिमियम ईभी ब्रान्ड जेको नेपाल आउने भएको छ । सोही ब्राण्ड अन्तर्गको अर्को ईभी ब्रान्ड ओमोडा बिक्री गर्दै आएको एसपीजी अटोमोबाइल्सले जेको जे६ मोडल नेपाल ल्याउने तयारी गरेको हो । हालै सम्पन्न बेइजिङ मोटर शोमा यसको ग्लोवल डेब्यु गरिएको थियो ।

आगामी नाडा अटो शो–२०२४ मा जेको जे६ नेपाल आउने र लगत्तै बुकिङ खुल्ला गरिने कम्पनी स्रोतले बताएको छ । चीनमा आईकार–३ नामले चिनिने यो एसयूभीलाई चेरीले जेको ब्याज राखेर अन्तर्राष्ट्रिय बजारमा बिक्री गर्न लागेको हो । यसको राईट ह्यान्ड ड्राइभ भर्सनलाई चेरीले पहिलो पटक अन्तर्राष्ट्रिय बजारमा नेपालमार्फत बिक्री सुरु गर्न लागेको हो ।

विश्व प्रख्यात विलाशी ब्राण्ड ल्याण्ड रोभरको डिजाइन क्यूमा आधारित जे६ एक प्रिमियम अफरोड एसयूभी हुने जनाइएको छ । यसको लम्बाई ४४०६ एमएम, चौडाई १९१० एमएम र उचाई १७११ एमएम तथा ह्विलवेस २७१५ एमएम छ । यो अफरोड एसयूभी निकै वक्सी र फ्युचरिस्टिक रहेको छ ।

रियर ह्विल र अल ह्विल ड्राइभ दुबै भर्सनमा उपलब्ध हुने यसको अल ह्विल ड्राइभ भर्सनले २७९ एचपी पावर दिने जनाइएको छ । यो नयाँ एसयूभीमा ६९.८ किलोवाट आवर क्षमतको एलएफपी ब्याट्री जडान गरिनेछ । जसले सिंगल चार्जमा ५०१ किलोमिटर रेन्ज दिने दावी गरिएको छ ।