ट्राफिक कारबाहीमा परेकाहरु स्वयंसेवक बनेर सडकमा खट्न सुरु

काठमाडौं– ट्राफिक नियम उल्लंघन गर्दा कारबाहीमा परेकाहरुलाई प्रहरीले स्वयंसेवकका रुपमा सवारी व्यवस्थापनमा खटाउन थालेको छ । बुधबार मात्र ६०४ जनाले उपत्यकाका विभिन्न चोकमा स्वयंसेवकका रुपमा ट्राफिक व्यवस्थापन गरेका छन् ।

उपत्यका ट्राफिक प्रहरी कार्यालयले बुधबारदेखि सचेतना कक्षा लिनुपर्ने किसिमका कारबाहीमा परेकाहरुलाई एक घण्टा ट्राफिक स्वयंसेवकको रुपमा खटाउन थालेको हो ।

कारवाहीमा परेकाहरुले बिहान ९ बजेदेखि ५ बजेसम्म सडकमा ट्राफिक व्यवस्थापन खटिनुपर्ने कार्यलयले जनाएको छ । उनीहरुलाई सिंहदरबार गेट, माइतीघर, भद्रकाली, पुतलीसडक, पद्मोदय मोड, सातदोबाटो चोक लगायत स्थानमा खटाइएको हो ।

उपप्रधान एवं गृहमन्त्री रवि लामिछानेले मंगलबार फेसबुकमा स्ट्याटस लेखेर महिनावारीको समयमा चार दिन महिला ट्राफिक प्रहरीले काम गर्नुनपर्ने घोषणा गरेका थिए । त्यसको साटो मापसे लगायतका कारबाहीमा परेकालाई ट्राफिक स्वयंसेवकको रुपमा खटाइने उनले बताएका थिए ।