जगुआर ल्यान्ड रोभरलाई भारतमै उत्पादन गर्ने टाटा मोटर्सको तयारी

काठमाडौं– लक्जरी कार ब्राण्ड जगुआर ल्यान्ड रोभर भारतमै उत्पादन हुने भएको छ । टाटा मातहत रहेको सो ब्राण्डलाई भारतमै उत्पादन गर्न टाटा मोटर्सले तमिलनाडु सरकारसंग सम्झौता पत्रमा हस्ताक्षर समेत गरिसकेको छ । १ अर्ब डलर लगानीमा नयाँ प्लान्ट बनाउने उक्त पत्रमा उल्लेख गरिएको हो ।

अन्तराष्ट्रिय मिडियाका अनुसार ल्यान्ड रोभरका कारहरू भारतमा ग्राउन्ड अपबाट उत्पादन हुनेछन् । भारतमा उत्पादन गरी विश्व बजारमा समेत निर्यात गर्ने टाटा मोटर्सको योजना छ ।

टाटा मोटर्सले २००८ मा ब्रिटिश लक्जरी ब्रान्ड जगुअर ल्यान्ड रोभरलाई प्राप्त गरेको थियो । कम्पनीको हाल बेलायत, चीन, ब्राजिल र स्लोभाकियामा प्लान्ट छ ।

टाटा मोटर्सले मार्चमा तमिलनाडुमा प्लान्ट स्थापना गर्ने आफ्नो योजना घोषणा गरेको थियो । यद्यपी कम्पनीले त्यहाँ कुन प्रकारका सवारी साधन उत्पादन गर्ने भन्नेबारेमा कुनै जानकारी दिएको छैन ।

सो नयाँ प्लान्टबाट कुन मोडल निर्माण हुनेछ भन्ने अझै स्पष्ट नभएपनि ईभी उत्पादनमा केन्द्रित हुने संभावना देखिएको छ ।