क्रेटा फेसलिफ्ट हात पार्न ५ महिनासम्म कुर्नुपर्ने, टप स्पेक र कालो रङ सर्बाधिक रुचाइयो

भारतमा १० दिनअघि लन्च भएको क्रेटा फेसलिफ्ट अहिले सर्बाधिक सफल बनिरहेको छ । हुन्डाई मोटर्स इण्डियाका अनुसार हालसम्म प्राप्त बुकिङलाई आधार मान्दा सो नयाँ एसयूभीलाई हात पार्न ग्राहकले ५ महिनासम्म कुर्नुपर्ने देखिएको छ ।

हुन्डाइले क्रेटा फेसलिफ्टलाई कुल १९ भेरिएन्टमा लन्च गरेको थियो । जसको सुरुवाती मूल्य ११ लाख भारु निर्धारण गरिएको छ भने सबैभन्दा महंगो भेरिएन्टलाई २० लाख भारु पर्छ । पेट्रोल, डिजेल र टर्बो पेट्रोल इन्जिनमा उपलब्ध नयाँ क्रेटा ५ गियरबक्स अप्सनमा उपलब्ध छ ।

भारतिय ग्राहकले यसको डिजेल इन्जिनलाई सर्बाधिक रुचाएको डिलर स्रोतहरुले उल्लेख गरेका छन् । उनीहरुका अनुसार डिजेल इन्जिामा यसको ६ स्पिड म्यानुअल र ६ स्पिड टर्क कन्भर्टर गियरवक्सलाई ग्राहकले अत्याधिक रुचाएका हुन् । यी भेरिएन्ट हात पार्न ग्राहकले ५ महिनसाम्म कुर्नुपर्ने उनीहरुको भनाई छ ।

यसैगरी क्रेटा पेट्रोल र टर्बो पेट्रोल भेरिएन्टलाई हात पार्न ४ महिनासम्म कुर्नुपर्ने देखिएको छ भने सो एसयुभीको टप–स्पेक एसएक्स(ओ) भेरिएन्ट सर्बाधिक लोकप्रिय बन्दै गएको छ । कलरका हिसावले भने सबैभन्दा बढी कालो रङ लोकप्रिय बनिरहेको छ ।

क्रेटा नेपाली बजारमा समेत सर्बाधिक रुचाइएको एसयूभी हो । भारतमा यसको फेसलिफ्ट लन्च भएपछि नेपालमा समेत एसयभुी पारखीले यसलाई प्रतिक्षा गरिरहेका छन् । नेपालका लागि आधिकारिक वितरक लक्ष्मी इन्टरकन्टिनेन्टल प्रालिले नयाँ क्रेटालाई फेब्रुअरी महिनाभित्रै लन्च गर्नसक्ने अनुमान गर्न सकिन्छ । नेपाल आउँदा यसको सुरुवाती मूल्य ५० लाख माथी निर्धारण हुने आँकलन गर्न सकिन्छ ।