ओम्नी इन्टरनेश्नलबाट गुम्यो भल्भोलिन लुब्रिकेन्ट्सको डिलरशिप, नयाँ बिक्रेतामा जगदम्बा मोटर्स

काठमाडौं– विश्वकै पुरानोमध्ये एक लुब्रिकेन्ट्स ब्राण्ड भल्भोलिनको नेपाली बिक्रेता परिवर्तन भएको छ । विगत लामो समयदेखी ओम्नी इन्टरनेश्नलले कारोबार गर्दै आएको सो लुब्रिकेन्ट्स ब्राण्डलाई शंकर ग्रुप अन्तर्गतको जगदम्बा मोटर्सले आफू मातहत ल्याएको हो ।

अमेरिकन ब्राण्डका रुपमा परिचित भल्भोलिनलाई पछि साउदी अरबको अराम्को कम्पनीले खरिद गरेपछि भारतसहित विश्वका कैयन राष्ट्रमा प्लान्ट स्थापना गरी उच्च गुणस्तरिय लुब्रिकेन्ट्स उत्पादन गर्दै आएको छ । भाल्भोलिन उत्पादन गर्ने अराम्को सेलपछि विश्वको दोस्रो ठूलो पेट्रोलियम उत्पादक कम्पनीका रुपमा परिचित छ ।

प्यासेन्जर कार सेग्मेन्टमा निकै नै लोकप्रिय मानिने सो ब्राण्डको नेपाली बजारमा भने कमर्सियल भेइकलमा समेत राम्रो खपत रहँदै आएको छ । जगदम्बा मोटर्सले डिलरसिप लिएपछि यसको खपत टु–ह्विलरमा बढेर जाने अनुमान गर्न सकिन्छ । कम्पनीले बिक्री गर्ने टीभीएस मोटरसाइकल र स्कुटरमा यसको प्रयोग हुने हुँदा यो सेग्मेन्टमा खपत बढ्ने देखिएको हो ।

टीभीएस सहित प्रोटोन ब्राण्डको कार तथा जेएमसी ब्राण्डको पिकअप ट्रक आयत गरी कारोबार गर्दै आएको जगदम्बा मोटर्सले हेभी इक्विपमेन्टमा केस ब्राण्डको पनि बिक्री गर्दै आएको छ । कम्पनीले यसअघि एड्नोक ब्राण्डको लुब्रिकेन्ट्स आयत गरी बिक्री गर्दै आएको थियो ।