एथरले नयाँ इलेक्ट्रिक स्कुटर ‘रिज्टा’ ल्याउने, टिजर भिडियो सार्वजनिक

इलेक्ट्रिक स्कुटर सेगमेन्टमा राम्रो चर्चा कमाएको कम्पनी एथर अहिले पनि नयाँ इलेक्ट्रिक स्कुटरमा काम गरिरहेको छ । कम्पनीले यसलाई एथर रिज्टा नाम दिएको छ । कम्पनीले सो स्कुटरको टिजर भिडियो सार्वजनिक गरेको छ ।

सार्वजनिक गरिएको टिजर भिडियोका अनुसार सो इलेक्ट्रिक स्कुटर चाँडै नै भारतीय बजारमा लन्च हुने सम्भावना रहेको छ । भिडियो अनुसार एथर रिज्टाको डेलिभरी आगामी ६ महिनाभित्र सुरु हुने स्पष्ट छ ।

उक्त भिडियो सेयर गर्दै कम्पनीले सो स्कुटरमा आरामदायक ड्राइभिङ र सुरक्षालाई प्राथमिकता दिएको स्पष्ट पारेको छ । आगामी रिज्टा स्कुटरले गुणस्तर र विश्वसनीयताका हिसाबले ग्राहकको अपेक्षा पूरा गर्नेछ ।

एथर रिज्टाको लन्च मितिको बारेमा कुनै जानकारी दिइएको छैन । रिपोर्टका अनुसार सो स्कुटर आगामी महिना भारतमा लन्च हुने अपेक्षा गरिएको छ ।

टिजर भिडियोमा यसलाई फराकिलो बडी स्ट्रक्चरमा देखाइएको छ, जसको अर्थ यसमा सिटको साइज ठूलो हुनेछ । सो स्कुटर पूर्ण रूपमा नयाँ प्लेटफर्ममा निर्माण गरिने अनुमान गरिएको छ ।

नेपाली बजारमा पनि हालै मात्र एथर स्कुटर ब्रान्ड भित्रिएको छ । नेपाली बजारमा बैद्य अर्गनाइजेसन अन्तर्गत बैद्य इनर्जीले एथर इलेक्ट्रिक स्कुटर बिक्री–वितरण गरिरहेको छ । नेपाली बजारमा हाल एथर ४५० एक्स इलेक्ट्रिक स्कुटर बिक्रीका लागि उपलब्ध छ ।

भारतीय बजारमा लन्च भए पश्चात एथर रिज्टा पनि नेपाली बजारमा समेत आउने अनुमान गर्न सकिन्छ ।