नेपालमा बिक्री भयो १ लाख यूनिट टिभिएस एनटर्क, यस्तो छ ६ वटै भेरिएन्टको मूल्य

काठमाडौं– टीभीएसको सर्बाधिक लोकप्रिय स्कुटर एनटर्कले नेपाली बजारमा १ लाख यूनिट बिक्रीको माइलस्टोन पुरा गरेको छ । सन् २०१८ को नाडा अटो शोमार्फत लन्च भएको एनटर्क ५ वर्षभित्र १ लाख युनिट बिक्री भएको हो । नेपालमा बिक्री सुरु भएपछि यसले टीभीएस ब्राण्डमा सर्बाधिक बिक्री हुने मोडलका रुपमा आफ्नो पहिचान बनाउँदै लगेको छ ।

पाँच वर्षअघि बीएस४ इन्जिनमा एउटा मात्रै भेरिएन्ट उपलब्ध रहेकोमा अहिले यसको बीएस४ र बीएस६ इन्जिनमा ६ वटा भेरिएन्ट उपलब्ध छ । साथै पाँच वर्षअघि २ लाख २५ हजारमा लन्च भएको यसको मूल्य अहिले सबैभन्दा सस्तो भेरिएन्टकै २ लाख ३५ हजार ९०० रुपैयाँ पुगेको छ भने महंगो भेरिएन्टलाई ३ लाख २० हजार ९०० पर्छ ।

नेपालमा लन्च भएदेखी नै १२५ सीसी सेग्मेन्टमा बजारको नेतृत्व लिन सफल यो स्कुटरको लुक्स र पर्फमेन्सलाई राइडरले अत्याधिक मात्रामा रुचाउँदै आएका छन् । कोभीड महामारीको समयमा प्रतिस्पर्धी ब्राण्डसंग पर्याप्त स्टक नहुँदा एनटर्कले एकछत्र नै बजार लिएको थियो ।

टीभीएस मोटर्सको नेपालका लागि आधिकारिक वितरक जगदम्बा मोटर्सले एनर्टको ६ वटा भेरिएन्ट उपलब्ध गराउँदै आएको छ । जसमध्ये सबैभन्दा सस्तो भेरिएन्ट बीएस४ स्ट्यान्डर्ड(ड्रम) को २ लाख ३५ हजार ९०० निर्धारण गरिएको छ भने यसकै डिस्क भेरिएन्टलाई २ लाख ६९ हजार ९०० पर्छ ।

यसैगरी बाँकी भेरिएन्टमा रेस एडिसन–बीए४ को २ लाख ७९ हजार ९००, सुपर स्क्वाड एडिसन–बीएस४ लाई २ लाख ८४ हजार ९०० र रेस एडिसन आरटीएफआई–बीएस६ को ३ लाख ५ हजार ९०० रुपैयाँ निर्धारण गरिएको छ भने रेस एक्सपी आरटीएफआई–बीएस६ लाई कम्पनीले ३ लाख २० हजार ९०० रुपैयाँमा बिक्री गर्दै आएको छ ।