हुन्डाईले सीईएस २०२४ मा सार्वजनिक ग-यो इलेक्ट्रिक एयर ट्याक्सी

हुन्डाईले आफ्नो नयाँ एयर ट्याक्सी मोडलको प्रोटोटाइप एस–ए२ संसारको सबैभन्दा लोकप्रिय टेक्नोलोजी शो सीईएस २०२४ मा सार्वजनिक गरेको छ । विश्वभर ट्राफिक समस्या बढ्दै गएको अवस्थामा इलेक्ट्रिक एयर ट्याक्सी महत्वपूर्ण सावित हुने कम्पनीले जनाएको छ ।

सो एयर ट्याक्सी हुन्डाईको अमेरिकास्थित एयर ट्याक्सी युनिट सुपरनलले विकास गरेको हो । एस–ए२ इलेक्ट्रिक भर्टिकल टेकअफ र ल्यान्डिङको प्रोडक्टको अवधारणा प्रदर्शन गर्दै कम्पनीले सो प्रोडक्ट सन् २०२८ सम्ममा तयारी हुने बताएको छ ।

हुन्डाईको एस–ए२ भी–टेल विमान हो, जुन १५०० फिटको उचाइमा १२० माइल प्रतिघन्टाको गतिमा उड्न सक्छ । यसमा उत्कृष्ट ब्याट्री प्याक छ, जसको मद्दतले यो ट्याक्सीले २५ देखि ४० माइलको दूरी तय गर्न सक्छ । यसमा ४ जना बस्न सक्छन् । कम्पनीका अनुसार सो विमानले निकै कम आवाज निकाल्छ ।

यसमा डिस्ट्रिब्युट इलेक्ट्रिक प्रोपल्सन आर्किटेक्चरको सुविधा दिइएको छ र यसमा आठ ओल–टिल्टिङ रोटर पनि समावेश छ, जसले सवारीलाई भर्टिकल लिफ्ट र होरिजन्टल क्रुज दुवै स्टेजमा पियरलेस एफिसियन्सीको साथमा पावर प्रदान गर्छ ।

यसको लागि सुपरनलको इन्जिनियरिङ टोलीले हुन्डाई मोटर ग्रुपको अटोमोटिभ डिजाइनरसँग साझेदारी गरेको छ ।