कोस्टिङ रिगेन फिचरसहित पारदर्शी बडी भएको एपेक्स ४५० इलेक्ट्रिक स्कुटर लन्च

एथर इनर्जीले भारतीय बजारमा फ्ल्यागशिप इलेक्ट्रिक स्कुटर ४५० एपेक्स लन्च गरेको छ । कम्पनीले सो स्कुटर डिसेम्बर १९ गतेदेखि बुकिङ सुरु गरेको छ । यद्यपि सो स्कुटरको डेलिभरी मार्च २०२४ देखि सुरु हुनेछ ।

कम्पनीले यसमा ५ वर्ष वा ६० हजार किलोमिटरसम्मको ब्याट्री वारेन्टी उपलब्ध गराएको छ ।
यो पारदर्शी बडी भएको विश्वको पहिलो इलेक्ट्रिक स्कुटर भएको दाबी गरिएको छ । यसले ओला एस१ प्रोसँग प्रतिस्पर्धा गर्नेछ । सो स्कुटर इन्डियम ब्लू कलर विकल्पमा मात्र उपलब्ध हुनेछ । साथै यसको हार्डवेयरमा कुनै परिवर्तन गरिएको छैन ।

कम्पनीले यसमा ३.७ किलोवाटको ब्याट्री प्याक दिएको छ । सो ब्याट्री फुल चार्ज गरेपछि १५७ किलोमिटरको रेन्ज दिने कम्पनीको दाबी छ । ब्याट्री ५ घण्टा ४५ मिनेटमा ० देखि १०० प्रतिशतसम्म चार्ज गर्न सकिन्छ । फास्ट चार्जरको प्रयोग गरेर ४५० एपेक्स १.५ किलोमिटर प्रतिमिनेटको स्पिडमा चार्ज गर्न सकिन्छ ।

नयाँ स्कुटरमा एथर ४५०एक्सको तुलनामा धेरै अपडेट गरिएको छ । यसमा ७.० किलोवाटको इलेक्ट्रिक मोटर जडान गरिएको छ, जसले ९.३८ बीएचपीको पावर र २६ एनएमको टर्क जेनेरेट गर्छ । यसले २.९ सेकेन्डमा ० देखि ४० किलोमिटर प्रतिघण्टाको गति हासिल गर्न सक्छ । यसको टप स्पिड १०० किलोमिटर प्रतिघण्टा छ । स्कुटरमा इको, राइड, स्पोर्ट, वार्प र वार्प प्लस गरी ५ मोड रहेको छ ।

सो ईभीमा कोस्टिङ रिगेन सुविधा पनि उपलब्ध छ । सो फिचरले स्कुटर गति बिना ढलान वा समतल सतहमा चलाउँदा यो सिस्टमले ब्रेक लागू नगरी स्कुटरलाई सुस्त बनाउँछ र ब्याट्रीमा ऊर्जा फर्काउँछ । यसले ७ प्रतिशतसम्मको राम्रो रेन्ज प्रदान गर्छ । साथै यसमा हिल होल्ड असिस्ट, पार्क असिस्ट, जीपीएस नेभिगेसन, राइड मोड, ब्लुटुथ कनेक्टिभिटी र लाइभ ट्रयाकिङ जस्ता फिचर समावेश छ ।