चेतकको प्रिमियम भेरिएन्ट ल्याउँदै बजाज, फिचर र रेन्ज बढ्ने

काठमाडौं– बजाजले आफ्नो इलेक्ट्रिक स्कुटर चेतकलाई ठूलो ब्याट्री प्याक दिएर ल्याउने भएको छ । ब्याट्रीको साइजसंगै यसमा केही प्रिमियम फिचर समेत थप गर्ने कम्पनीले जनाएको छ ।

चेतकको प्रिमियम भेरिएन्टमा ३.२ किलोवाट आवरको ब्याट्री प्याक जडान हुनेछ । हाल बिक्री हुँदै आएको भेरिएन्टमा २.८८ किलोवाट आवरको ब्याट्री प्याज जडान गरिएको छ, जसले सिंगल चार्जमा १०८ किलोमिटर रेन्ज दिने कम्पनीको भनाई छ ।

नयाँ भेरिएन्ट प्रिमियमा ठूलो साइजको ब्याट्री जडान हुने हुँदा यसले दिने रेन्ज समेत १२७ किलोमिटर हुने कम्पनीको दावी छ । साथै यसको टप स्पिड समेत ६३ किलोमिटर प्रतिघण्टाबाट बढेर ७३ किलोमिटर पुग्ने आँकलन गरिएको छ । स्कुटरलाई ४ घण्टा ३० मिनेटमै फुल चार्ज गर्न सकिन्छ ।

सो नयाँ भेरिएन्टमा टिएफटी ड्यास समेत उपलब्ध हुनेछ । जहाँ ब्लुटुथ कनेक्टिभिटी, टर्न–बाई–टर्न नेभिगेसन टायर प्रेसर मोनिटरिङ र रिमेट लक÷अनलक लगायत फिचर प्रयोगमा ल्याउन सकिन्छ । यसको डिक्की स्पेस समेत १८ लिटरबाट वढेर २१ लिटर पूग्ने कम्पनीको भनाई छ ।