इलेक्ट्रिक ट्याक्सीबाट सेवा दिने छुट्टै राइड सेयरिङ एप सञ्चालनमा

काठमाडौं– इलेक्ट्रिक ट्याक्सीबाट सेवा दिने छुट्टै राइड सेयरिङ एप ‘ई–ड्राइभ नेपाल’ सञ्चालनमा आएको छ । ई–ड्राइभ नेपालको सेवा बिहिबारदेखी सुरु भएको हो ।

कम्पनी आफैँले इलेक्ट्रिक ट्याक्सी किनेर चालकलाई किस्ताबन्दीमा उपलब्ध गराउने गरी ई–ड्राइभ नेपाल राइड सेयरिङ एप सञ्चालनमा ल्याइएको कम्पनीका अध्यक्ष राजेश मास्केले बताए । ‘कम्पनीले इलेक्ट्रिक ट्याक्सी मात्रै चलाउने छ । यसका लागि पहिलो चरणमा ४० वटा ट्याक्सीमार्फत सेवा दिइनेछ’ उनले भने ।

मास्केका अनुसार कम्पनी आफैँले इलेक्ट्रिक ट्याक्सी किनेर चालकलाई उपलब्ध गराउनेछ । ट्याक्सी लिन चाहने चालकले सुरुमा ७ लाख रुपैयाँ तिर्नुपर्छ । महिला चालक भएमा ५ लाख मात्रै तिरे पुग्छ । यसपछि मासिक ७० हजार रुपैयाँको हाराहारीका दरले किस्ता बुझाउनुपर्छ ।