सेफ्टि टेष्टमा हुन्डाईको नयाँ भर्नालाई ५ स्टार रेटिङ

हुन्डाईको नयाँ भर्नाले सेफ्टि टेष्टमा ५ स्टार रेटिङ पाएको छ । ग्लोवल एनक्यापले गरेको सेफ्टि टेष्टमा भर्नाले यस्तो नतिजा हात पारेको हो । यससंगै हुन्डाईको भारतमा बिक्री हुने पहिलो ५ स्टार रेटिङ पाउने कारमा समेत सो सेडान कार दर्ज भएको छ ।

हुन्डाईले ६ वटा एयरब्याग, इलेक्ट्रोनिक स्ट्याविलिटी कन्ट्रोल(ईएससी), रियर आइएसओफिक्स माउन्ट र सवै सिटमा सिट बेल्ट रिमाइन्डर लगायत फिचर दिइएको मोडललाई सो टेष्टमा पठाएको थियो । परिक्षणमा भर्नाले ‘एडल्ट अक्यूपान्ट प्रोटेक्सन’मा कुल ३४ अंकमा २८.१८ पाएको थियो भने ‘चाइल्ड अक्यूपान्ट प्रोटेक्सन’मा कुल ४९ मा ४२ अंक पाएको हो ।

नयाँ भर्ना १४९७ र १४८२ सिसी पेट्रोल इन्जिनमा उपलब्ध छ । मेनुअल र अटोमेटिक दुईवटै ट्रान्समिसनमा उपलब्ध यसको पावर ११३.१८ वीएचपी तथा टर्क १४३.८ एनएम छ । भारतीय बजारमा ६ महिनाअघि लन्च भएको भर्ना नेपालमा भने हालसम्म पनि उपलब्ध हुन सकेको छैन ।