नेटा लाइनअपमा थपिँदै तीन नयाँ मोडल, नेटा एक्स अर्को महिना लन्च हुने

चिनियाँ ईभी निर्माता होजोन मोटर्सले दुई वर्षभित्र थप तीन नयाँ मोडल लन्च गर्ने घोषणा गरेको छ । यी नयाँ मोडलमा एउटा नेटा एक्स हुने निश्चित भइसकेपनि वाँकी दुई मोडलका बारेमा भने प्रष्ट जानकारी आइसकेको छैन । नयाँ ईभीको मूल्य चीनमा ४१ हजार डलारभन्दा कम पर्ने जनाइएको छ ।

होजोन मोटर्सले हाल एसयुभीमा नेटा एया, नेटा यू र नेटा भी उपलब्ध गराउँदै आएको छ भने सेडानमा नेटा एस र नेटा जिटी मोडल उपलब्ध छन् । जसमध्ये नेपाली बजारमा नेटा भी र नेटा यू बिक्रीका लागी उपलब्ध रहँदै आएको छ । नेपालका लागि आधिकारिक वितरक सीजी मोटर्सले हालै सम्पन्न नाडा अटो शोमा यसको नेटा एस र नेटा जीटीलाई प्रदर्शनीमा राखेको थियो ।

तीनवटै नयाँ मोडललाई कम्पनीले शान्हाई चेसिस २.० प्लेटफर्ममा निर्माण गर्ने जनाएको छ । साथै यसमा हाओजी टेक्नोलोजी प्रयोग हुनेछ । अर्को महिना लन्च हुने नेटा एक्स ४६१९ एमएम लामो, १८६० एमएम चौडा र १६२८ एमएम अग्लो हुनेछ । यो सब् कम्प्याक्ट एसयूभीको ह्विलवेश २७७० एमएम रहनेछ ।

पावरट्रेनको कुरा गर्नुपर्दा नेटा एक्स ईभीमा ७२ किलोवाट आवरको एलएफपी ब्याट्री र १७० किलोवाटको मोटर जडान हुनसक्ने आँकलन गरिएको छ । यसको इन्टेरियरमा १५.६ इन्चको स्क्वायर स्क्रिन, ८.९ इन्चको फुल एलसिडी इन्स्ट्रयुमेन्ट प्यानल, आरामदायी सीट र सुरक्षाका लागी एडिएएस लगायत फिचर हुनेछन् ।