यस्तो छ क्लासिक ३५० को क्रोम र डार्क एडिसन(मूल्य सहित)

काठमाडौं– रोयल इन्फिल्डको सर्बाधिक लोकप्रिय मोडल क्लासिक ३५० थप दुई एडिसनमा नेपाल आएको छ । रोयल इन्फिल्डको नेपालका लागि आधिकारिक बिक्रेता अल्फा अटोमोटिभले नाडा अटो शोमा रोयल इन्फिल्ड क्लासिक ३५० क्रोम एडिसन र क्लासिक ३५० डार्क एडिसन सार्वजनिक गरेको हो ।

कम्पनीले क्लासिक ३५० डार्कको मूल्य ५ लाख २५ हजार रुपैयाँ र क्रोमको ५ लाख ३० हजार रुपैयाँ तोकेको छ । दुवै भेरियन्टको बुकिङ समेत खुल्ला गरिएको छ । दुवै मोटरसाइकलमा डुअल डिस्कब्रेक छ भने स्पीड सेन्सर पनि राखिएको छ । यी मोटरसाइकलमा किक स्टार्ट हटाएर सेल्फ स्टार्ट सिस्टम राखिएको छ भने अन्य फिचरहरू केही परिवर्तन नगरी पुरानै यथावत राखेको छ ।

दुवै मोटरसाइकल जे प्लेटफर्ममा निर्माण गरिएको हो । यी मोटरसाइकलमा ३४९ सीसी सिंगल सिलिन्डर, फ्युल इन्जेक्टेड फोर स्ट्रोक, एयर–ओयल कुल्ड, एसआएचसी एफआइ रहेको छ । उक्त इन्जिनले अधिकतम ६१०० आरपीएममा २०।४८ बे्रकहर्स पावर र ४००० आरपीएममा २७ एनएमको टर्क जेनेरेट गर्छ ।

टाइमलेस स्टाइलिङ डिजाइनमा रहेको यी मोटरसाइकलमा हेलोजन लाइट, एनालग डिजिटल इन्स्ट्रयुमेन्ट मिटर, यूएसबी चार्जिङ पोर्ट, लामो मेटल एक्जस्ट, वाइडर सीट, वाइडर टायर, ट्युबलेस टायर, स्पीड सेन्सर, टेलिस्कोपिक सस्पेन्सन र ट्वीन सक अब्जर्बार जस्ता फिचरहरू पाउन सकिन्छ ।