गोदावरी इलेक्ट्रिक मोटर्सको पहिलो इलेक्ट्रिक स्कुटर ईब्लु फियो लन्च, कस्तो छ स्कुटर ?

गोदावरी इलेक्ट्रिक मोटर्सले भारतमा आफ्नो पहिलो इलेक्ट्रिक स्कुटर लन्च गरेको छ । कम्पनीले अगस्त १५ मा यसको बुकिङ सुरु गरेको थियो भने अब यसको डेलिभरी सुरु हुनेछ ।

कम्पनीले सो स्कुटरमा २.५२ किलोवाटको ब्याट्री प्याक दिएको छ । यसमा रहेको मोटरले ११० एनएमको टर्क जेनेरेट गर्छ । राइडिङका लागि यसमा इकोनोमी, नर्मल र पावर मोड दिइएको छ । सिंगल चार्जमा सो स्कुटरले ११० किलोमिटरको रेन्ज प्रदान गर्छ । यसको टप स्पिड ६० किमी प्रतिघन्टा रहेको छ । साथै यसमा रिजेनेरेटिभ टेक्नोलोजी पनि दिइएको छ ।

कम्पनीले यसमा ब्लुटुथ कनेक्टिभिटी, फराकिलो फ्लोरबोर्ड, कन्भेनियन्स बक्स, मोबाइल चार्जिङ पोर्ट, ७.४ इन्च फुल डिजिटल कलर डिस्प्ले, कल अलर्ट, साइड स्ट्यान्ड सेन्सर जस्ता फिचर दिइएको छ ।

सो स्कुटर कम्पनीले ९९ हजार ९९९ भारु मूल्यमा लन्च गरेको हो । साथै यसमा कम्पनीले ३ वर्ष र ३० हजार किलोमिटरको वारेन्टी पनि दिएको छ ।

रेन्ज र मूल्यका हिसाबले सो स्कुटर ओलाको वान एक्स, बजाज चेतक, टीभीएस आइक्यूब जस्ता इलेक्ट्रिक स्कुटरसँग प्रतिस्पर्धा गर्नेछ । ओलाको वान एक्स फुल चार्जमा १५१ किलोमिटर, बजाज चेतकले १०८ किलोमिटर र आईक्युबले १०० किलोमिटरको रेन्ज प्रदान गर्छ ।