विश्व ईभी बजारमा चीन एक्लैको हिस्सा ६१ प्रतिशत

चीनमा पछिल्लो समय इलेक्ट्रिक भेइकलको बिक्रीले एकपछि अर्को नयाँ किर्तिमानी रेकर्ड कायम गरिरहेको छ । सन् २०२३ को जनवरीदेखी जुन महिनासम्म विश्व बजारमा बिक्री भएको कुल ईभीमध्य ६१ प्रतिशत हाराहारी इभी चीनमा बिक्री भएको तथ्यांक वाहिर आएको छ ।

चाइना प्यासेन्जर कार एसोसिएसनले सार्वजनिक गरेको तथ्यांक अनुुसार ६ महिनाको सो अवधीमा विश्वभर ७२ लाख २० हजार ईभी बिक्री भएको छ । जसको ६१ प्रतिशत हिस्सा चीनमा मात्र बिक्री भएको हो ।

उक्त बिक्री परिणाम अघिल्लो वर्षको सोही अवधीको तुलनामा ४५ प्रतिशतले वढी भएको एसोसिएसनले जनाएको छ । जुन महिनामा मात्र चीनमा १२ लाख ८० हजार ईभी बिक्री भएको थियो । ईभीसंगै चीनमा प्लग–इन–हाइब्रिड कारको मागमा समेत उच्च दरले बृद्धि भइरहेको छ ।

६ महिनाको सो अवधीमा सवैभन्दा वढी टेस्लाले २४ प्रतिशत इभी उत्पादन गरेको छ भने उसलाई पछ्याउँदै बीवाईडीले १५ प्रतिशत र एसएआईले ८ प्रतिशत इभी उत्पादन गरेको छ । यसैगरी अन्य दुई ठूला इभी उत्पादकमा फक्सवागन र गीली–भोल्भो सामेल छन् । यी ब्रान्डले ७ र ६ प्रतिशत इभी उत्पादन गरेका हुन् ।