२५ लाखसम्मको अटो कर्जामा जोखिमभार अव १०० प्रतिशत

काठमाडाैँ -२५ लाखसम्मको अटो कर्जामा जोखिमभार घटेको छ । नेपाल राष्ट्र वैंकले मौद्रिक नीतिमार्फत ल्याएको उक्त व्यवस्था कार्यन्वयनका लागि शुक्रबार परिपत्र जारी गर्दै २५ लाखसम्मको अटो कर्जाको जोखिमभार १०० प्रतिशत कायम गरेको हो । यसअघि सवै प्रकारका निजी गाडीको अटो कर्जामा जोखिमभार १५० प्रतिशत रहेको थियो ।

राष्ट्र बैंकले ल्याएको यो नयाँ प्रावधानले साना र सस्ता गाडीमा कर्जा प्रोत्साहन हुने देखिएको छ भने ठूला र मंहगा गाडीमा जाने कर्जालाई कडाई गर्न खोजिएको प्रष्ट हुन्छ । हाल कम्वसन गाडीमा वैंकहरुले ५० प्रतिशतसम्म मात्र कर्जा दिन पाउने सुविधा रहेको छ भने इलेक्ट्रिकमा ८० प्रतिशतसम्म कर्जा दिन पाउनेछन् ।

जसअनुसार ५० लाख रुपैयाँसम्म मूल्य पर्ने कम्वसन र १ करोड २५ लाखसम्म पर्ने इलेक्ट्रिक गाडीमा दिइने कर्जामा वैंकहरुको जोखिमभार कम भएको हो । यसले वैंकहरुलाई कर्जा प्रवाह गर्न सहज बनाएको छ । कर्जा सहज वनेसंगै यो सेग्मेन्टका गाडीको बिक्रीमा केही हदसम्म सुधार आउने भएपनि ठूला र महंगा गाडीमा जोखिमभार १५० प्रतिशत नै कायम रहेका कारण यस्ता गाडीमा कर्जा दिन वैंकहरुले कडाई गर्ने व्यवसायीहरुको भनाई छ ।